Krisis sa tubig

Daghan nang Lokal Government Unit (LGU) ang nagreklamo sa Metropolitan Cebu Water District (MCWD) tungod sa kakuwang ug kahinay sa tubig nga gi-supply niini ngadto sa ilang mga konsumidor. 

Tungod niini gibaharan ni Cebu City Mayor Edgardo Labella ang mga sakop sa Board sa MCWD sa paglihok sa suliran kay kun dili, sila ilisan.

Agi og tubag sa nagkalapad nga reklamo nga nadawat, gipasabot sa MCWD nga sa tunga-tungang bahin niining buwan sa Septembre sobra na sa 20,000 ka cubic meter matag adlaw ang nawagtang nga tubig nga nakaapekto usab sa 20,000 ka mga panimalay.

Usa sa mga dakong hinungdan sa pagkahinay ug paggamay sa supply sa tubig mao ang pagsagol na sa tubig parat ngadto sa tubig tab-ang nga nakapugos sa ilang mga pribadong supplier sa pagsira sa ilang mga tinubdan sa tubig sa lungsod sa Consolacion aron malikayan ang pagkadaut niini tungod kay dili luwas nga imnon ang tubig nga may sagol dagat o parat.

Gawas sa pagsagol sa tubig parat sa tubig tab-ang nagkagamay usab ang tubig ilawom sa yuta nga angayan nga panalipdan aron mapreserbar para sa umaabot pa nga henerasyon.

Giingon sa MCWD nga anaa sa 400,000 cubic meter ang tubig nga gikuha ilawom sa yuta. Sa 400,000 cubic meter, 60 porsiyento ang gikuha sa ilang mga pribadong supplier samtang 40 porsiyento lamang niini ang gikuha sa MCWD.    

Apan ang Metro Cebu Development and Coordinating Board (MCDCB) nga gipangulohan ni Gobernador Gwendolyn Garcia sa ilang tigum nga gihimo, ilang nasuta nga 60,000 litros nga tubig ang wala makaabot sa ilang mga kliyente matag adlaw gumikan sa buslot niining mga tubo nga wala dayon nila maayo.

Gawas niini, mas maayong panid-an ug tan-awon pud sa MCWD ang lihok sa ilang mga pribadong supplier og tubig kay basin pud og gisabotahi sila niini aron ilogan sila sa ilang negosyo.