Maling sipa ni Kick-ko
TANONG ng kaibigan ko, tunay ba ang ipinapahayag na malasakit ni Sen. Francis “Kiko” Pangilinan sa mga magsasaka at mangingisdang Pilipino?
Wagas kasi siyang tagatuligsa ng nilagdaang batas ni Presidente Duterte na Rice Tariffication Law (RTL) na naglalaan ng ayudang tatlong bilyong piso para sa tinatayang 2.4 milyong magsasakang Pilipino.
Pero bakit siya bumabatikos gayung bumuo rin siya ng sariling Bill na halos katulad ng RTL na tinawag niyang Sagip Saka Act (RA 11321) na pinirmahan ni Presidente Duterte noon lang isang buwan. Pabor ako na may oposisyon, pero ang pagkontra sa alin mang polisiya ng administrasyon ay kailangang may tamang layunin at dahilan para sa ikabubuti ng nakararaming mamamayan. Hindi lang para masabing ginagawa mo ang tungkulin bilang oposisyon.
Marami ang nagtataka lalo na sa mga consumer groups at grupo ng mga magsasaka kung bakit wala siyang ipinatupad na reporma sa Department of Agriculture noong siya ay may pagkakataong gawin ito. Kung magugunita, sa panahon ni Presidente Noynoy, hinirang siyang Presidential Assistant for Food Security and Agricultural Modernization noong 2014.
Si Kiko ay chairman din ng National Food Authority Council sa panahong may nadiskubreng bode-bodegang nabubulok na bigas dahil sa kawalanghiyaan ng ibang rice traders. Lalo pang lumobo ang bilyong utang ng NFA noong panahong yaon.
Sumabit din ang pangalan niya nang maakusahan si dating NFA administrator Arthur Juan na diumano’y nangingikil ng P1-million sa isang rice trader sa Bulacan. Pinabulaanan ni Kiko ang pagkakaladkad sa kanyang pangalan sa nasabing anomalya.
Kung inyong natatandaan, sa mga panahong yaon nang Pangulo pa si Noynoy, nagkaroon ng pilahan sa pagbili ng bigas lalo na ng NFA rice. Bukod pa riyan, nagdusa rin ang mga coconut farmers sa Southern Tagalog dahil sinalanta ng cocolisap ang kanilang pananim.
Kaya ang payo kay Kiko ng kapwa niya senador, huwag masyadong umepal sa problema ng mga magsasaka at mangingisda noong panahong yaon ng Noynoy administration.
- Latest