Pahawa na lang

Mibahad si Raquel Arce nga maoy hepe sa PROBE Team sa City Hall nga wala na gyuy mga sidewalk vendors sa Colon Street ug Osmeña Boulevard karong Lunes, kay ugma pa lang, hawanan na nila ang maong dapit.

Buyno, tan-awon nato. Awhag nako sa mga sidewalk vendors nga dawata na ninyo ang gihatag nga relocation site alang kaninyo, basin adto na mo mangita kon puno na sa mga nag-ukopar.

Angay na gyud nga hawanan ang atong mga aseras kay sulod sa daghang katuigan, kuwang og political will ang atong mga opisyal.

Karon angay’ng suportahan nato si Mayor Edgardo Labella nga mipakita og kaisog sa pagtuman sa tahas kaniya sa Malacañang.

Tinuod, malooy kita sa mga sidewalk vendors kay panginabuhian man nila ang maapektohan, apan lisud man sab gud kay ang mga pedestrians ang maapike.

Sa nanglabay’ng katuigan nagsalig sila kay duphan man dayon sa mga tawo nga maoy mohunghong sa mayor nga dili lang kaayo estriktuhon ang mga sidewalk vendors kay mga botante ra ba kini sa siyudad.

Mao kana ang nakadaot kay ang mga politiko kaniadto, mahadlok sa mga vendors nga dili na unya mobotar kanila, ilabi na nga daghan sa mga nagnegosyo sa Colon mga Muslim.

Mora’g hinigtan ang kamot sa mayor kay unsaon, gitudlo man siya nga “Sultan” sa mga Muslim dinhi sa Sugbo.

* * *

May mitug-an nako nga si Mayor Edgardo Labella gitanyagan usab diay nga himoong Sultan sa mga Muslim sa Sugbo. Maayo gani kay mibalibad ang mayor kay nakapanglantaw man siya nga mahigtan gyud ang iyang kamot kon iya kining dawaton.

Isip Sultan, iyang katungod ang pagpanalipod sa mga sakop mao nga atol sa termino ni kanhi mayor Tomas Osmeña gipasagdan ra niya nga ang mga Muslim sidewalk vendors migara pag-ayo.

Wala sila did-i sa pagpaninda, apan didto sa dapit nga gitagana alang kanila. Ayaw na kamo nianang inyong batasan nga maoy magbuot kun asa kamo gusto nga maninda.

Si Presidente Duterte nga maoy inyong gibotohan, ug apil kamo sa 16 milyones ka botante nga mipili kaniya, maoy nagmando nga i-clear ang mga karsada ug aseras. Busa otong ug ayaw pagreklamo.

* * *

Pwerteng daghana nga mga tag-iya ug kabalayan ug tindahan nga anaa sa aseras sa V. Rama Avenue, gimandoan usab nga panggub-on ang kabahin sa ilang balay nga anaa sa aseras.

Wala gyud ko malipay nga nagtan-aw sa mga hulagway nga nagpakita sa abuso.

Angay kini nga hawanan ug magpasalamat ko ni Konsehal Junjun Osmeña nga maoy nangunay pagpangulo niining mao nga dalaygong kalihokan.