Recycled Drugs

Dili na bag-o pa kining isyu sa pag recycle sa illegal substance o shabu nga mao usay gibutyag sa kadagkoan sa Philippine Drug Enforcement Agency kon PDEA nga dunay mga pulis nga nalambigit niini.

Gani ang p ubliko murag natanom na sa ilang huna huna nga mao kini ang nahitabo sanglit dili man jud nahurot ang shabu.

Posibleng tinuod o dunay basehan ang ang pagtoo sa uban og karon gikan na mismo sa PDEA nga nahitabo gyud diay kini.

In fairness sa atong kapolisan dili pud seguro tanan nalambigit sa pag recycle og drugas, naa say nagtinarong apan dili kalikayan nga naay nagbinuang, sila ang gitawag nga mga Ninja Cop.

Ang Ninja Cop lahi sa Narco Cop, ang mga ninja nga pulis sila ang mga nagpahigayon og pagpanakop sa mga durugista unya ang masakmit nga drugas isip ebidensya kuhaan nila ug ibalik sa drug market, sa yanong pag estorya i recycle ang nasakmit nga illegal drugs.

Kun ni exist kining mga Ninja Cops, unsay gihimo sa PNP organization aron mapapas sila?

Dinhi sa Central Visayas, admitido si Police Bregadier General Debold Sinas, Regional Director sa PRO7 nga dunay mga pulis nga nalambigit sa naasoy’ng tinonto.

Kini ang hugot nilang gibantayan ug kun mapamatod-an silotan. Wala hinoon mobutyag si Sinas pila ka mga pulis ang nalambigit sa pag recycle sa og shabu. Usa sa gihimo sa PRO7 pagpalig-on sa programang pagkabig sa nga pulis nga magtinarong mao ang moral recovery sa kapolisan. Ambot madala pa kaha ang mga badlongon niini?

Dunay sugyot nga hinganlan ang mga pulis nga nalambigit sa pag recycle sa shabu aron mailhan ug dili na dudahan ang uban nga nagtinarong.

Samtang ang PDEA nga maoy napabuto sa isyu, segurado pud kaha sila nga walay nahitabong drug recycling sa ilang ahensya?

Kun dunay ninja cop basin ug naay ninja agents sa PDEA, dili ta ka seguro sa tintasyon illegal nga drugas nga ilang gihuptan bugti sa tinagingting sa kwarta.