Dinautay sa Show

Kini ang kasagaran  natong makita ug masinati labina sa mga tawo nga dako kaayo ug insecurity sa ilang kinabuhi.

Imbis mopunting na lang sa ilang angayang himoon kun hain man gani sila nahimutang, nahimo naman nuon silang magpunay lamang pagpaburot sa ilang kaugalingon pinaagi sa ilang pagdaut sa uban.

Dautan nila ang uban aron sila ang mogawas nga bayani. Dauton nila ang uban aron tingali ilang matago ang ilang mga kakulangan.

Pasiunhan nila ang mga tawo kalabot sa ilang achievements ug bisan unsang maayo nga isumpay sa ilang bansagon aron lamang sa mga tawo sila pagadaygon.

Sa akong tan-aw baya imbes kaligutgotan kining mga tawhana angayan lamang nga ato silang kaluy-an, kaluy-an tungod kay sila mismo ang wala makatugkad sa bili sa tawhanong pagtahud tungod kay sila mismo ubos og tan-aw sa kaugalingon mao nga ubos pud kunohay ang ilang pagtan-aw sa uban. Mao nga imbes mopokus sa ilang mahimo ingon nga tabang sa katilingban nagpunay naman nuon sila og pangita og bikil ngadto sa ubang mga tawo.

Apan ang tinud-anay nga tawo maantigong moangkon sa iyang kahuyangan ingon man kalapasan.

Mao nga bisan pa man kun sayud siya sa iyang kahimtang maantigo siyang mohangop niini dungan usab ang paghangop sa ubang mga tawo nga sama niya dunay kakuwangan ug kalapasan.

Mao nga tinuod gyud ang ginaingon nga kun unsay imong gitakus ngadto sa uban mao usab ang taksanan nga gamiton batok kanimo ug kuyog niini ang mga pulong nga malibkas gikan sa imong baba mao man usab ang timaan sa imong pagkatawo.

Dunay usa ka tawo nga nilitanya kanako nga ako kuno mao ni mao na apan sa dagan sa among pakigkukabildo mas natataw nako nga ang tanan niyang gipanulti batok nako dili diay alang nako kondili iya diay ang panginahanglan ug coping mechanism sa iyang low self-esteem nga kaugalingon. Pa bossy- bossy aron dili ingnong sissy.