Pagbalik sa polio

Natarantar karon ang kagamhanan, ilabina ang Department of Health, niining pagbalik sa polio, ang gikaintapan nga sakit nga kaniadto miepekto og liboan ka kabataan dinhi sa nasud sa nangaging mga dekada.

Ambot nganong mitumaw kining maong sakit nga hagbay ra man unta kining nawala sa nasud sukad sa hapit 20 ka tuig. Kinsa kahay atong mabasol niini? Ang hingtungdang mga ahensiya na o mismo ang katawhan.

Sa niaging semana, maoy misugat kanato ang dakong balita nga adunay 3-anyos nga batang babaye didto sa Lanao del Sur ang nataptan sa polio. Una kining kaso sukad nga gideklara ang Pilipinas nga polio-free sa World Health Organization kaniadtong 2000.

Ug sa niaging mga adlaw, mitumaw ang ikaduhang kaso sa polio sa nasud sa dihang nadiskobrehan ang maong sakit sa 5-anyos nga batang lalaki didto sa probinsiya sa Laguna. Kini ang hinungdan nga modeklara na og national outbreak sa polio ang DOH.

Gani mopahigayon na usab og halapad nga anti-polio vaccination drive ang DOH sa nasud.

Una nilang gipunterya ang Tondo ug ubang lugar sa Manila diin adunay positibo nga sinyales sa maong sakit basi sa sample nga nakuha sa maong ahensiya.

Gani, dinhi sa lalawigan sa Sugbo, miarangkada na usab ang immunization drive sa kagamhanan batok sa polio sa mga kalungsoran.

Ug miawhag usab ang Provincial Health Office sa mga ginikanan sa pagpabakuna sa ilang mga anak.

Kinsa kahay mabasol niining pagbangon pag-usab sa gikahadlokan nga polio nga sulod sa halos duha ka dekada nahimong libre ang nasud gikan niining maong sakit? Ang health department ba o ang komunidad.

Basin baya kun kumpiyansa lamang ang kagamhanan, ilabina ang DOH, sa ilang kampanya batok sa polio karon nga panahona. Hinuon, dili nato ikalimod nga aduna say pagkulang mismo ang katawhan niining pagbalik sa polio.

Kini gumikan sa ilang kapakyas pagpabakuna aron paglikay sa maong balatian.