Pagputol sa mga kahoy

Dili gyud angay’ng kawilihan kun pamutlon ang pipila ka kahoy nga anaa sa atong mga karsada ug sa daplin sa mga karsada.

Tinuod, dunay mga kahoy nga angayang protehean kun ang dapit nga iyang nahimutangan, gamiton na sa publiko.

May mga pamaagi aron kaprotehean ang maong mga kahoy ug dili mamatay. Usa niini mao ang pagluka aron balhinon pagtanom sa laing dapit.

Daghan ang nangreklamo kay gipangputol sa mga kawani sa DPWH ang mga kahoy nga nahimutang taliwala sa Don Gil Garcia Street kilid sa Kapitolyo.

Gianugnan sila kay kuno ang maong mga kahoy dugay na kaayo ug ang uban nagpangidaron ug sobra na sa 30 ka tuig.

Ang maong mga kahoy gitanom kilid sa karsada kaniadto apan diha nga gipalapdan na sa DPWH ang karsada, nakahasol ug nakamugna na og risgo sa mga motorista ang maong mga kahoy.

Gisusi nako ang pinutlan sa maong mga kahoy ug nasuta nako nga angayan na gyud nga pangputlon ang maong mga kahoy’ng acasia kay makahatag ra kini og peligro, dili ra sa mga motorista, kondili sa katawhan.

Dunay pipila sa maong mga kahoy nga ang dapit sa iyang subok, nalungag na ug ang daplin na lang niini maoy naghatag og kalig-on nga makabarug ang kahoy.

Banabana nako nga moabot ra ang higayon nga ang maong mga kahoy mangatumba ra, sama sa nahitabo sa mga kahoy’ng acasia, atubangan sa City Hall.

Apan bisan pa og walay daot ang mga kahoy apan anaa na kini taliwala sa karsada nga naghatag og kapeligro sa publiko, angay na gyud kining kuhaon kon ang rason mao nga ang dapit nga iyang nahimutangan kapahimuslan sa kadaghanan.

* * *

Diha sa Transcentral Highway paingon sa Barangay Busay, dunay pipila ka kahoy nga anaa sa karsada nga wala gayud maputol kay ang DENR wala man mohatag sa DPWH og cutting permit.

Ambot kanus-a kaha mosulod sa utok ning mga opisyal sa DENR nga angay’ng kuhaon na ang maong mga kahoy gikan sa karsada. Unta nga walay madisgrasya kanila kon moagi sila diha panahon sa gabii.

Buyno, nindot ang plano ni Mayor Edgardo Labella nga mopahigayon siya og mga tree planting activity ug target niya nga moabot sa tulo ka milyon ka punoan ang iyang mapatanom sa tulo ka tuig niyang pangatungdanan.

Apan angay’ng sutaon usa ni Mayor Labella kay basin og kun dagko na ang maong mga kahoy, may proyekto na usab ang kagamhanan nga pagpalapad sa karsada.

Kun dili ninyo ayuhon sa pagplano, moabot ra gihapon ang higayon nga daghan na usab unya ang magbagulbol sa umaabot nga katuigan.