Ban sa baboy

Padayon ang dakong kaguliyang dinhi sa lalawigan sa Sugbo gumikan sa pagkuyanap African Swine Fever (ASF) dinhi sa Pilipinas nga miresulta na sa pagpatay sa liboan ka mga baboy didto sa pipila ka probinsiya sa Luzon.

Hinuon wala pay bisan usa ka kaso sa baboy nga nataptan sa ASF virus dinhi sa Sugbo sukad sa pagsulod niini sa nasud. Kini basi usab sa mga pakisusi sa kagamhanan sa lalawigan, Department of Agriculture ug ubang ahensiya.

Gani, padayon nga miimposar og ban ang mga kagamhanan sa dakbayan ug probinsiya pagsulod sa mga baboy ug pork-related products gikan sa ubang kanasuran ug ubang lugar sa Pilipinas aron paglikay sa maong virus.

Hinuon dili lang Sugbo. Miimposar usab si Bohol Governor Arthur Yap og ban sa mga baboy gikan sa Luzon, diin pipila ka lalawigan ang nakompirmar nga adunay ASF nga mipatay na usab og daghan baboy didto.

Tungod niini gikahadlokan sa sektor sa mga magpapatigayon nga maapektohan gayud ang industriya sa baboy sa nasud niining maong ban sa Sugbo ug Bohol sa mga baboy ug mga pork gikan sa Luzon ug ubang lugar sa nasud.

Dili kana layo nga posibilidad tungod sa ka dako sa swine industry sa Central Visayas. Ang Sugbo lang daan dako nga market sa industriya sa baboy. Gani moabot na kini og P10 bilyones, matud pa sa kagamhanan sa lalawigan.

Mao nang dili nato mabasol si Department of Agriculture Secretary William Dar nga mihangyo sa mga opisyales sa Sugbo ug Bohol nga irekonsidera ang ban sa baboy gikan sa Luzon. Kini tungod tungod makaapekto kini’g dako sa nationa hog industry.

Ambot kun moluag ba ang ang Sugbo ug Bohol ug mosanong sa panawagan ni Dar. Sa pagkakaron, nagdumili si Cebu Governor Gwendolyn Garcia pagtando sa maong panawagan. Ug kon magpadayon ang ban, dako gyud tuod nga problema sa industriya.