Daw nagduwa’g tubig-tubig

Taliwala sa kalisang sa katawhan sa giingon nga African Swine Fever (ASF), miawhag ang DTI sa mga lokal nga kagamhanan sa paglugak sa ilang mga lagda pagpasulod sa mga “pork products” sa ilang hurisdiksyon.  Apan ang Dept. of Agriculture gikataho nga mogasto og minilyon nga pundo sa gobyerno aron pagsakbang sa hulga sa ASF. Niining managlahi nga baruganan sa duha ka ahensya, daw nagdula-dula ang gobyerno og tubig-tubig.  Pagklaro tawon mo uy. Ayaw kamo pagtulod-tulod kay basin mangahagbong mo. Saoonz!”

Price rollback na lang unta

Sa susamang balita mahitungod sa Asian Swine Fever, mipadayag ang mga tag-iya sa mga restaurant dinhi sa Sugbu nga padayon gihapon sila’ng modawat og order sa lechon ug nga aduna sila’y igong supply nga ikasakbang sa panginahanglan sa katawhan. Mipasalig sila nga luwas sa sakit ang ilang aslon nga baboy kay gikumpra nila kini sa mga lokal nga tinubdan. Dili pa igo ang maong pamahayag aron mawala ang kahadlok sa katawhan.  Tingale kon menosan nila ang presyo sa lechon, diha pa mag-ambahan ang katawhan. Na hala, price rollback na!

Hayahay pa sa pulis?

Mipadayag si Senate President Vicente Sotto III nga adunay mga priso sa New Bilibid Prison nga gigamit nga mga “hired killers” ug “runners” sa mga drug lords.  Dugang pa niya nga adunay mga priso nga nahuman na unta sa ilang sentensya apan nagpabilin gihapon sa Bilibid tungod sa maong rason.  Dili na man makurat ang katawhan niining gibutyag sa Senador kay dugay na man kini nga modus. Pagkaanindot baya sa kinabuhi sa mga priso: aduna na’y trabaho, libre pa board and lodging. Hayahay pa sa Pulis?

Dili ija-ija, aho-aho

Matud sa Executive Director sa TEAM, adunay bag-ong ‘traffic system’ nga ipahigayon sa U.N. Avenue sa tuyo nga mamenosan ang kahuot sa trapiko sa maong dalan.  Tanang paagi mahimong suwayan aron maluag ang dagan sa trapiko, bisan mogawas na nga giti-awan lang nato ang atong kaugalingon.  Kay lage ang nag-una’ng hinungdan sa trapik mao man ang kadaghan na sa sakyanan nuntan sa kakulang sa atong infrastruktura.  Nilangkob nga paningkamot sa mga ahensya sa kagamhanan ang gikinahanglan. Dili pwede ang “ija-ija, aho-aho”!