Alang sa kaayohan sa publiko

Gukuninitan ilabi na sa mga netizens ang isyu mahitungod sa mga tulay sa Mandaue ug Mactan nga nahimong instrumento sa paghikog sa uban.

Giklaro sa Pronvincial Capitol nga wala i-ban ang mga bikers nga moagi sa taytayan sukwahi sa nahaunang gika-report nga nakapaulbo sa negatibong reaksyon sa publiko. Makaagi ra man kadtong mga bikers apan gikinahanglan nga ilang guyoron o dili sakyan ang bike sa higayon nga moagi sila sa tulay.

Para nako, makaayo kini sanglit alang ra man kini sa safety sa mga tawo tungod kay peligro man pud sa mga magbisiklita ang naasoyng dapit ilabi na kon masaghiran sa mga sakyanan.

Gani base sa akong experience kay kada adlaw man ko gaagi sa tulay buntag og hapon makita gyud nako nga dunay magsakay sa ilang besiklita makigdungan sa mga motor, mopidpid sa mga sakyanan ang uban, naa pay mogunit kay magpaguyod sa mga multicab ilabi na sa subidahon nga parte sa tulay.

Delikado gyud kay gamay’ng saghid lang segurado man gyud nga madisgrasya busa angayan lang nga mokanaug sila sa besikleta ug guyoron kini hangtod makalabang na.

Bisan moingon ang uban nga eksperto na sila sa pagmaneho sa ilang bike kay mga professional bikers na apan mas maayong makaseguro nga luwas ang tanan. Ang uban basta makasaway lang wala tan-awa nga ang gihimo sa gobernador alang ra usab sa kaayohan sa kinabag-an.

Seguro angayan mangasuko kun dili na gyud tugotan nga makaagi sa tulay ang nagbitbit og bisekleta o did-an na ang mga tawo nga maglakaw sa tulay aron wala na gyuy makaambak ug magpakamatay.

Bisan seryoso nga issue ang suicide apan dili mahimong maamong ang tanan nga dili na paagion ang mga tawong magbaklay sa tulay, apan dili usab kini himoon sa provincial government. Busa mas maayo sabton gyud ang issue sa dili magpataka og komento.

Sa kadaghan na sa atimanon sa atong gobiyerno dili na seguro haum nga pangunayan pa ang pagtutok niining mga tawo nga gustong moambak sa taytayan aron mapugngan.

Taliwala pa man niini gihatagan og dakong pagtagad mismo ni Governor Gwen Garcia ang issue karon nga nahibalik na siya sa pwesto bisan pa man og nakadawat siya og mga pagsaway.

Walay gamay o dako nga problema basta naglambigit kini sa kinabuhi sa katawhan ang gitutokan nga pwede naman gani nga isalig niya sa mga lgu sa Mandaue ug Lapu-Lapu.

Inay sawayon, tan-awon usab seguro ang positibong resulta sa lakang sa gobernador.

Gawas sa tulay, mas maayo seguro nga tutokan ang isyu sa mental health dili lang sa gobierno kon dili mag gikan mismo sa pamilya ug sa komunidad.

Sa pamilya pa lang daan estoryahan na ang problema tabangan sa pagsolbad sa ingon dili na moadto sa tulay ang mga tawo aron moambak.

Gikinahanglan gyud nga bukas kita sa pagpaminaw niadtong mga tawong dunay gipas-an nga dako kaayong problema kay basin ang matag usa kanato maoy mahimong anghel dela gwardiya nga dili na modayon sa paghikog ang usa ka tawo.

Mas maayo sad seguro dunay news blackout sa insidente sa suway o paglukso sa taytayan kay sa akong obserbasyon sa higayon nga mahisgotan ang hikog sa tulay magsunod sunod gyud dayon nga dunay mosuway paglukso.

Basin duna kiniy epekto nga mabutang dayon sa huna huna nila ang tulay kon duna silay problema.