Nganong di man Lapu-Lapu City

Quincentennial Committee?

Ang Mactan usa lang ka barangay sa dakbayan sa Lapu-Lapu. Apan, gumikan sa mga kaugmaran karon didto sa Barangay Mactan nga nahimo ang tourist destination ug nahimutangan sa mga dagkung resort establishments, and among others paghingalan sa tugpahanan og Mactan-Cebu Int’l Airport, ug pag-refer sa Mactan nga maoy nahimutangan sa duha ka taytayan, mas nailhan ug mas nailado na hinuon ang Barangay Mactan kay sa Lapu-Lapu City.

Hangtud nga pila nako ka higala nga wala kaayoy kasinatian sa geography, nangutana kun sakop ba sa Mactan ang Opon (karon Lapu-Lapu City).

Moy gidangat. Ingonman lakip ang Isla sa Olango dili na masayran nga barangay lamang kini sa dakbayan sa Lapu-Lapu.

Mao nga medyo nahibulong ko ngano nga wa nganli og Lapu-Lapu City Quincentennial Committee ug mao na hinuoy gi-promote pagsamot ang   barangay Mactan. Wala kita mag-question sa wisdom sa nagmugna niini. Nahibong lang gyud ko.

Ug ngano man nga ang tuyo niini mao ang pag-assist sa National Quincentennial Committee (NQC)? Sila diay ang magbuot sa tanang kalihokan sa okasyon?

Kita unta dinhi maoy mga front liners sa kasaulogan, ug sila didto sa Manila, maoy mo-assist, mo-actively support ug mogahin sa igong fundo alang sa maong selebrasyon paghandom sa ika-500 nga kasumaran sa Kadaugan sa Mactan niadtong Abril 27, 1521.

Of course, ang sentro sa selebrasyon mao gayud ang Barangay Mactan. Apan, di lang ko gusto nga medyo mawani ang dakbayan sa Lapu-Lapu niining daku nga nasudnong kasaulogan.

Nga kun unsa man ang mga plano sa NQC kinahanglan mo-coordinate sila sa Lapu-Lapu City Quincentennial Committee.

Kay alang nako, mas nasayud kita kay kanila didto sa kaulohan kon unsay angay buhaton, ug  kon unsay appropriate nga mga kalihokan nga mohaum sa kasaulogan.

Wa na tay mahimo niini. Namugna na ang committee, ug nanumpa na ang mga sakop niini pinangulohan ni Mayor Junard Chan isip Chairman ug iyang kapikas isip Co-chairman, Vice Mayor Celsi Sitoy, vice chairman, ug city Tourism officer Edward Mendez,Secretary.  

Kun unsa man ang nahunahunaan karon sa NQC ila kining i-incorporate sa ato usab nga plano ug programa nga nahan-hay. 

Ang upat ka mga sakop sa komite gilangkuban sa regional director sa Tourism, mga representante gikan sa Hotel and Restaurant Association of Cebu ug sa  Department of Education, ug ang Mayor sa Cordova. Maayo tingalig iapil si Resil Mojares isip consultant.

At any rate, congratulations nilang tanan. Daku ug bug-at ang tahas nga gisangon ngadto kanila  ilabina na kon sila gayud ang mangulo sa kasaulogan ug dili usa lang ka coordinative committee.

O di ba magpasakop sila, as a committee sa  NQC diin ang mga meeting niini anhi gayud himua sa Lapu-Lapu City, ug dili didto sa kaulohan, aron sila gayud ang muanhi pagtambong sa tigum.

Maayo sad tingali nga i-involved ang 30 ka barangay sa dakbayan, regardless sa mga party affiliations. For all we know, tingalig aduna silay mas bright ug mas makahuloganon nga mga sugyot. .

By the way, ato unang temporarily ipadaplin ang politika, at least karon lang niining atong pagsaulog sa pagkabayani ni Lapu-Lapu. Inighuman, fight na pud politically, kun gikinahanglan man.