Nag-iyahay sa ASF

Kun wa pang kamatngon si Agriculture Secretary William Dar ang kaguliyang sa African Swine Flu (ASF) nga nitumaw sa nagkalainlaing bahin sa nasud sa nangaging mga adlaw nanukad sa iyang pag-insistir pagtago sa kasayuran sa pagsud na sa Pilipinas sa kagaw nga nakapatay na sa minilyon ka baboy sa ubang kanasuran sa kalibotan.

Namugos si Dar nga di niya ibutyag ang tanang kasayuran sa ASF – apil nang gidaghanon sa mga baboy nga naapektahan ug ang mga dapit nga ilang nahimutangan – aron nga di ma-alarma ang katawhan. Sukwahi hinuon ang sangpotanan sa iyang binuang.

* * *

Ang paglutaw sa patay’ng mga baboy sa mga sapa sa Marikina City ug Quezon City nisukwahi sa pasalig ni Dar nga kontrolado ang sitwasyon.

Ang kasayuran nga ang mga baboy mahimong naggikan sa Rizal, usa sa mga lalawigan nga iyang giila nga nasudlan na sa ASF, nihimong kadudahan sa iyang pangangkon nga na-quarantine nang apektadong mga baboy.

Ang pag-ban sa ubang mga lalawigan sa baboy gikan sa Luzon klaro sang pagsalikway sa pasalig ni Dar nga ang ASF nakatakod ra sa mga baboy sa pito ka barangay sa Rizal ug Bulacan.

* * *

Kay unsaon man tuod nimo pagsalig ni Dar nga:

• Naunhan pa sa Taiwan sa pagpahibawo nga may gidudahan nang mga kaso sa ASF sa Luzon;

• Nag-una-una og pasalig nga di ASF ang namatyan sa mga baboy bisan wa pa mogawas ang resulta sa laboratory tests sa ubang kanasuran; ug

• Naghuwat pa og lima ka adlaw una gipahibawo sa katawhan nga positibo na gyud diay sa ASF ang Rizal ug Bulacan.

* * *

Human nipasalig nga gipatay nang tanang baboy sud sa usa ka kilometro nga radius ug gitanggong nang tanang baboy sud sa pito ka kilometro nga radius sa natakdang mga barangay sa Rizal ug Bulacan, niangkon si Dar nga niabot nang kagaw sa ubang bahin sa Central Luzon.

Apan di gihapon ilhon kay, nakatag-an ka, magkaguliyang ang katawhan.

Daghang salamat sa kakuwang og liderato ni Dar nag-iyahay ang lokal nga mga opisyal paghimo sa bisan unsang lakang pagsagang sa ASF.

Apil ang pagdeklarar ni Quezon City Mayor Joy Belmonte nga nasudlan na sila sa ASF ug busa gipapatay ang tanang baboy.

* * *

[email protected]