EDITORYAL - Malapasong drivers

Mokabat dul-an 400 ka mga motorista ang gidakop ug naisyuhan og tiket tungod sa nagkalain-laing mga traffic violations sa gilusad nga lapad nga operasyon sa Inter-Agency Council for Traffic (I-ACT).

Makadismaya kaayo kay kaning maong mga kalapasan dili man bag-ong balaod kun dili naa na kini dugay na, apan daghan gihapon ang mga malapason. Nakabalo ba kaha sila sa balaod o wala o nagpagoryo-goryo lang gyud kay mga gahi gyud og ulo?

Niadtong adlaw nga Biyernes ang I-ACT nihimo og operasyon diha sa V. Rama Avenue, Barangay Guadalupe, Cebu City ug didto daghan gyud ang nasita sa mga operatiba, pipila ka mga sakyanan ug motorsiklo ang gi-impound tungod sa mga kakuwangon sa ilang mga papeles.

Maayo ang ingon niini nga mga operasyon nga gipangulohan ni Land Transportation Office-7 regional director Victor Caindec tungod kay para man kini sa kaluwasan sa mismong mga drayber nga nagmaneho.

Gani, bisan sa higpit nga pasidaan daghan gihapong mga magsakay og motorsiklo nga dili magsuot og helmet o dili mao nga helmet ilang gigamit, nag-tsinelas, dunay mga gagmay nga mga batang angkas, ug daghan pang uban.

Samtang sa mga de sakyanan, nag-unang kalapasan sa mga drayber mao kining dili pagsuot sa ilang seatbelts. Overloaded ug daghan pang mga kalapasan nga pulos nagbutang sa kinabuhi sa drayber, pasahero ug sa mga pedestrians sa peligro.

Sa pagkatinuod, kung buot tan-awon dili kini para sa kaluwasan sa mga taga I-ACT, kondili para sa hintungdang mga drayber.

Gawas pa, maayo sab kini tungod kay dili lang ang mga drayber ug ilang mga paglapas sa traffic laws ang gitutokan sa I-ACT kondili hasta sab ang paggukod sa mga colorum vehicles, illegal parking, illegal terminals, anti-fixer ug anti-fake driver’s license, trip cutting ug overcharging.

Karon nga hinayhinay nang nakaapas sa backlog ang LTO sa pagprinta og mga lisensya, plaka wala na kaayoy rason ang publiko nga magbagutbot, kun duna man gani angay direkta kining isumbong sa maong ahensya ug dili sa social media.