EDITORYAL - Matatahimik na si Joanna Demafelis

NAKAMIT na ng Pinay overseas worker na si Joanna Demafelis ang hustisya at maaaring matahimik na ang kanyang kaluluwa. Noong nakaraang linggo, napatunayan ng Syrian court na pinatay si Joanna ng mga amo nito na sina Mouna Ali Hassoun, isang Syrian at asawang si Nader Esam Assaf, isang Lebanese. Kamatayan ang hatol sa kanila. Ito ang ikalawang hatol sa mag-asawa dahil sa krimen. Ang una ay noong Abril 2018 nang hatulan sila ng Kuwait court ng kamatayan din sa pamamagitan ng pagbigti. Hindi pa batid kung anong uri ng parusa ang igagawad ng Syria sa mag-asawang killer pero sabi ni Foreign Affairs Sec. Teddy Locsin Jr., siguradong kamatayan ang kahahantungan ng dalawang killer.

Karumal-dumal ang ginawa kay Joanna ng kanyang mga amo sa Kuwait. Naglilingkod si Joanna sa mga ito bilang domestic helper simula 2014. Noong Pebrero 2018, isang abandonadong apartment sa Kuwait ang sinalakay ng mga pulis at nahindik sa nakita sa loob ng freezer --- isang bangkay ng babae. Nakilala ang bangkay na kay Joanna Demafelis. Marami itong pasa sa katawan.

Ayon sa report, maaaring isang taon na itong nasa freezer. Tumakas ang mga amo nito at inabandona ang apartment na inuupahan. Walang makapagsabi kung ano ang dahilan at pinatay si Joanna. Sabi ng kapatid ni Joanna na nasa Pilipinas, bigla raw tumigil sa pakikipag-communicate ang kanyang kapatid sa kanila kaya humingi siya ng tulong sa Embahada sa Kuwait subalit hindi sila pinapansin ng mga opisyal doon.

Hanggang sa makialam na ang Department of Labor at saka lamang nabatid ang nangyari kay Joanna sa kamay ng mga amo nito. Nagalit si President Duterte at iniutos ang deployment ban ng overseas workers sa Kuwait. Inalis lamang ang ban makaraang mangako ang Kuwait na puproteksiyunan ang mga Pinoy workers sa Kuwait. Ilang buwan ding natigil ang pagpapadala ng domestic helper sa Kuwait.

Nakamit na ni Joanna ang hustisya. Kamatayan din ang hatol sa mga malulupit niyang amo. Kung ano ang inutang, ganundin ang kabayaran. Tiyak na mapapayapa na si Joanna saan man siya naroroon ngayon.