Ang uban mga ligoy

Karong buntag, ang mga kawani sa Cebu City Hall, manglimpyo kuno sa Mahiga Creek. Ayaw mo’g kahibulong nga migamit ko sa pulong “kuno” kay gigamit man sab nako ang pulong “mga kawani.”

Ang tinuod, paputol ko’s liog kuon ang tanan ba gyud nga mga kawani maoy moadto ug manglimpyo. Sigurado ko nga ang uban moadto lang sa tagsa-tagsa nila ka venues aron mo-fill up sa listahan.

Sus, nakasaksi gyud ko sa pipila na ka mga pagpanglimpyo sa kasapaan nga pipila ra ang molihok, samtang ang uban magtindog lang ug dili mamunit og mga basura. Ang uban gani dili man gyud manaog ngadto sa sapa, ug anha ra sila sa ibabaw sa mga tulay ug sa tampi sa sapa magkalingaw og tan-aw sa ilang mga kauban. Dili ba gud tinuod?

Aw hinoon, wala may trabaho kay Sabado man karon, apan kun dili sila motabang, dili na lang unta sila motunga kay mura man og igo ra sila nga nagpaihap, apan diay walay kapuslanan ang ilang presensya.

* * *

Kining pagtumaw sa isyu sa African Swine-Flu Virus, kun kagaw nga makapatay sa mga binuhing baboy, mura’g makapahadlok sa katawhan apan makahatag kini og benepisyo sa mga local hog raisers. Abi ninyo og ngano? Ang mga opisyal dinhi sa probinsya ug Dakbayan sa Sugbo, miluwat na og kamandoan nga dili itugot nga adunay mga baboy nga gikan sa Luzon nga matumod dinhi aron ibaligya, kay basin og nataptan kini sa maong kagaw.

Giisyu kagahapon ni Mayor Edgar Labella ang Executive Order 015 nga nagdili sa pagpasulod dinhi sa siyudad sa mga baboy ug karne nga gikan sa Luzon.

Ang kaayohan nga makuha sa mga local hog raisers niini mao nga mopaspas ang ilang halin kay wala na man ang ilang mga kakompetensya nga gikan sa Luzon.

Pero, akong ipasabot pag-ayo aron dili mahadlok ang mga tawo. Ang African Swine-Flu Virus dili makadaot kun kini makaon sa mga tawo, apan ang mga baboy nga nataptan, sigurado nga mangamatay dayon.

Bisan gikan sa mga delata nga karne nga gikan sa mga nasud nga natakboyan og ASFV, dili mamatay ang kagaw ug inig-abli, mokatap dayon ang mga kagaw ngadto sa kahayopan.

* * *

Congrats diay sa mga kawani sa sibyaanan DYHP nga gipangulohan ni Atty. Ruphil Fernandez Bañoc kay kagahapon nagsaulog sila sa ika-56 ka tuig nga sumad sa pagkamugna sa ilang sibyaanan.

Nakatambong ko, ug nakatilaw sa lamian kaayo nga lechon nga kabahin sa makabuhong nga paniudto, kay didto man si Mayor Edgardo Labella isip ilang guest speaker, ug ako isip reporter sa City Hall, naminaw sa iyang diskurso.

Omedeto Gozaimasu mga amigo nako sa DYHP-RMN-Cebu.