Buntis gibalibaran sa pre-natal checkup?

Ang serbisyo sa katawhan walay gipili basta nagkinahanglan angayan gyud nga tabangan.

Apan usa ka mabdos nga taga Lawaan 1 dakbayan sa Talisay ang wala makatilaw aning serbisyoha.

Si Mary Grace Badayos miadto sa health center sa barangay kay magpa pre-natal apan gibalibaran ug gi-refer na hinoon sa silingang barangay.

Wala may midwife nga available maong napasa pasa na hinoon ang buntis, pastilan ka luoy intawon.

Ang katarongan kuno sa midwife nga naglibog siya sa boundary sa barangay. Kung tinuod man ugaling ka babaw ra gyud intawon sa iyang rason. Unta gipatigbabaw niya ang iyang kasing kasing regardless asa naggikan ang tawo nga nagkinahanglan og panabang. Kun naminaw lang siya sa iyang konsensya dili gyud mahitabo nga adunay masilo o mahiubos kaniya. Gikinahanglan ba gyud diay nga molupyo ka anang barangaya ayha maka-avail sa serbisyo? ambot lang pud basin dunay patakaran nga ingon niana?

Isip usa ka tawo nga mobati sa isig ka tawo dili gyud unta mohikaw sa pagtabang ilabi na nga naay gisamkon nga anghel ang naasoy’ng babaye. Moingon ra ba dayon ang mga kaila aning midwife nga angayan unta kuhaan og habig sa isyu, gikuhaan bitaw siya sa media wala man magpa interview.

Mao lagi bisan unsa man ang iyang katarongan masakto man o dili, ang sangpotanan nga wala siya magpakabana sa iyang isig ka babaye nga nagpatabang kaniya.

Sakit kaayo alang sa buntis nga gibalibaran, nakamugna kini kaniya og stress tungod sa kahiubos nga dili gyud unta angayan niyang bation tungod ug alang sa bata nga iyang gisabak nga maapektohan.

Angayan nga hinoktokan sa tanan ilabi na sa mga frontliners sa health services nga kinabuhi ang nakataya sa imong mga kamot busa ipatigbabaw intawon ang inyong pagka tawo. Bisan unsa pay gamitong rason wala gyuy lusot ang midwife tungod kay dili ikalimod nga wala niya atimana ang mabdos nga si Mrs. Badayos.

Maayo gani kay reprimand ra ang iyang natilawan gikan ni Mayor Samsam Gullas og wala siya pahamtangi og mas bug-at nga silot. Maghatag unta kini og leksyon sa mga naa sa serbisyo nga conscious kaayo anang “Aho aho system” o tungod nga dili taga ila ang nagkinahanglan og tabang dili nalang gyud tabangan.