Online card fraud

Daghan sa mga depositors sa United Coconut Planters Bank (UCPB) ang nangangha dihang wala nay sulod ang ilang account. Sagad sa mga biktima mga kawani sa Kapitolyo kang kansang sweldo tua iagi sa UCPB. Nagbagulbol intawn ang mga kawani labi pa kadtong nagkinahanglan kaayo sa ilang kwarta nga hinaguan tungod sa ilang mga obligasyon gumikan kay dili pa nila ma-withdraw ang ilang kwarta.

Gawas niini nahasol ug kinahanglan silang mobiya sa ilang trabaho aron pagproseso sa gikinahanglang mga papeles sa bangko. Matud sa mga nabiktima nga unya pa sa Nobyembre nila makuha ang nahanaw nilang kwarta.

Ang kadagkuan sa UCPB mipasalig sa ilang mga kliyente nga gihimo na nila ang mga lakang aron makuha pagbalik sa mga depositors ang ilang kwarta. Giangkon sa mga tagdumala sa bangko nga daghan ang reklamo nga ilang nadawat  mahitungod sa “ online card fraud.”

Sigun sa pamahayag sa bangko nga dunay mga illegal nga transaksiyon gamit ang Visa cards sa ilang mga kliyente. Apan gipasalig sa bangko nga wala makumpromiso ang ilang system. Wala kunoy hacking sa system nga nahitabo kon dili “online card fraud” lang. Ang buot nilang ipasabot nga ang mga card sa ilang depositors maoy nakopya ug nagamit nga way kalibutan ang tag-iya ug dili ang tibuok security system sa bangko maoy naapiki.

Sumala sa UCPB nga dunay proseso nga kinahanglang subayon aron mabawi ang kantidad nga nahanaw. Giawhag sab nila ang mga cardholders sa pagreport gilayon ngadto sa bangko sa mga kadudahang transaksiyon gamit ang ilang account. Hinaut nga dili ingon ka dako ug ka seryoso ang problema. Ug hinaut nga mapaspasan sa UCPB ang proseso pag-uli sa kwarta sa ilang mga klIyente. Kun tinuod nga Nobyembre pa nila makuha ang ilang kwarta, kaluoy sa probreng mga kawani sa gobyerno nga naapektuhan.

Dili intawon makahuwat og Nobyembre ang ilang mga obligasyon sa kuryente, tubig, ug bayranan sa eskwelahan niadtong dunay mga anak nga nagtungha. Dili nila sala ang nahitabo ug responsibilidad sa bangko nga sigurohon nga protektado ug luwas ang hinagoan nga kwarta sa ilang mga klIyente. Sa kadaghan sa mga nangreklamo imposible nga walay problema ang system sa bangko. Tingali og usa o duha lang kabuok ang apektado makaingon ka nga card lang ang nakompromiso, apan daghan kaayo ang apektado. Gani sigun sa akong nahibaw-an duna pay huwis nga apil sab sa nabiktima.