Firecracker nga sabon

Tudloan sa TESDA kadtong tigbuhat og mga firecrackers sa Bulacan sa pagbuhat og ‘SABON’ human momando si Presidente Duterte nga limitahan na ang paggamit sa mga firecrackers.

Baniog na baya kaayo ang abilidad sa Pinoy nga mokumbinar. Kon makat-on na unya ang mga taga-Bulacan sa paghimo sa maong produkto, makalaum ba kita nga aduna na unya’y pabuto nga gitakuban nga sabon? Hala no?

Niapil na ang BFAR

Mipasiugda karon ang BFAR sa kampanya paggamit sa mga ‘mosquito fish’ aron masumpo ang pagsanay sa lamok nga maoy hinungdan sa sakit nga dengue.

Mahimong hangpon sa katawhan ang maong pamaagi.  Apan niining pagsalida ug pag-apil sa BFAR  sa isyu nga gawas na unta sa ilang mandato, wa ba kaha molutaw ang ka-inutil sa DOH sa pag-atiman sa maong epidemya? Nangutana lang!

Wa’y common sin (sense)

Miangkon ang usa ka kawani sa DPWH nga angayan unta nga giuna pagbuhat ang ‘road widening project’ nga may kauban nga drainage system sa wala pa buhata ang underpass sa Mambaling aron malikayan unta ang baha sa maong dapit. Apan kay naproblema man ang pagsubasta sa maong proyekto, giuna na lang nila pag-implementar ang underpass project.  Inay makahatag og katin-awan, makadugang na man hinoon sa mga pangutana ang maong pamahayag. Susama ba kini sa giingon sa akong silingan nga “Walay common SIN (sense).” Logic pa more!

Kanta na lang og “Magellan”

Alang sa Presidente dili angayan isaulog ang pag-abot sa mga Katsila dinhi sa atong nasud nga maoy hinungdan sa atong pagkaulipon sa hataas nga panahon.

Alang sa simbahang Katoliko, dili ang kaulipnan maoy gisaulog kon dili ang pagkahimugso sa Kristiyanismo sa atong nasud.

Wala pa mahimong polisiya ang pamahayag sa Presidente apan kon magmagahi gayod siya, hayan magsige na lang unya kita og patukar sa kanta ni Yoyoy Villame nga giulohan ug “Magellan”. Alegre!

Politika ang hinungdan?

Dili kumbinsido ang Senado nga angayan hatagan og ‘emergency powers’ ang Presidente alang sa pagsulbad sa problema sa trapiko sa kaulohan sa rason nga wala makapresentar ang DoTr og usa ka transport masterplan sa pagsulbad sa trapiko.

Dili ra man gud maproblema ang mga politiko sa trapiko kay aduna man sila’y escort nga magwangwang kon moagi na sila sa kadalanan.  Politika pa more!