Maayo na lang kay nabaraw

Gikan sa pagdula og games sa cell phone ug computer ngadto sa pagbaligya og mga butang, dili na nato ikatingala pa ang mga bolakbol sulod sa buhatan sa mga local government unit ug uban pang ahensiya sa gobiyerno.

Sulod sa daghang dekada, wala gayuy nakabaraw niining ilegal nga hirit sa mga empleyado sa gobiyerno. Kini tungod lagi kay kulang sa kugi nga monitoring ang Civil Service Commission (CSC) ug ubang mga concerned agencies.

Mao nang sa dihang nasakpan sa CSC ang giingong pipila ka trabahante sa Cebu City Hall nga nagdula sa ilang cell phones ug busy og pag-make up panahon sa office hours, daghan ang nabaghoan ug miisa ilang kilay.

Kini gumikan lagi kay wala man gayud maanad ang ordinaryong katawhan nga Pilipinhon nga mo-roving diay ang kadagkoan sa maong komisyon sa mga buhatan sa gobiyerno aron pagpaniid batok niadtong malapasong empleyado.

Tukmang silot ang nagpaabot niadtong giingong nasakpan sa CSC nga nagbinuang sa trabaho sulod sa ilang office hours. Kini kon mapamatud-an nga  empleyado gayud sila sa lokal nga pangagamhanan sa dakbayan sa Sugbo.

Apan hinaut nga agresibo usab ang CSC ug ubang hingtungdang ahensiya sa gobiyerno pag-monitor sa mga pangpublikong opisina. Kini kun gusto gayud kita nga madisiplina ang tanang empleyado sa kagamhanan ug nga tamdan nila ang palisiya sa tiniuray nga pagserbisyo.

Kay kun dili relihiyoso ang kagamhanan niining maong kampanya, padayon gayud kining mga pagbolakbol sa pipila ka badlongong trabahante sa gobiyerno. Kini gumikan kay walay mga mata nga nakatutok sa ilang trabaho.

Sa laing bahin, magsilbi usab nga leksiyon sa tanang trabahante sa gobiyerno ang pagkabisto niining mga badlongong empleyado sa City Hall, nga aduna gayud diay mga mata nga nagpahipi ug nagsusi sa ilang pagserbisyo sa publiko.