Special treatment for LGBT sayop

Akong sampot naulpot! Naisag kalit dihang si Bataan Rep. Geraldine Roman miingon, nga ang pagsulod-gamit sa usa ka bayot og kasilyas para sa mga lalaki naghatag og dakong risgo sa nagpakababaye nga linalang.

Kay kuno basig binastosan, kulatahon, o binuangan sa malditong lalaki ang mahuyang.

Mga katarongan nga alang nako, dili solidong rason nga patukorog laing pansayan ang tanang hingutdang establisamento para lamang nilang tawo, kinsa mipili nga usbon ang orihinal nilang gender nga hinatag sa Ginoo.

Kay kon may pangabuso nga gibuhat sulod sa CR, puwede man mokiha ang bayot, o si bisan kinsang naagrabyar.

Ang lalaki bisag putlon pa nang ilaha aron ilisag iyaha sa babaye, magpabilin gihapon siyang lalaki. Ang babaye nga magpataod og iyaha sa lalaki, siya babaye gihapon.

Sila ra ang nagbunyag sa ilang kaugalingon nga: Lesbian, Gay, Bisexual and Transgender (LGBT) agig panundayon sa unsay tinuoray nilang  gibati sulod sa ilang kasingkasing.

Kutob sa kinsay gustong mousab sa ilang gender, sila dapat tawgog: ‘Pekeng babaye ug Pekeng lalaki.’ Ug dili gyod mahitabo nga mahimo silang tinuorayng babayeg lalaki.

Kay walay si bisan kinsa nga makausab ug makapasipala sa mga binuhat sa Diyos. Ang magbuhat sa ingon, nakasala Kaniya.

Ug may tukmang silot pag-abot sa higayon nga i-recall na ta Niya.

Ang pamahayag ni Roman nasabwag sa social media human ang usa ka trans woman (bayot) Gretchen Custodio Diez, 28, gibadlong sa janitress dihang misulod sa Ladies CR, diin nahimo kining dakong kontrobersiyal.

Sakto man ang gibuhat sa janitress. Nganong mosulod man ang bayot sa Ladies CR nga lalaki man siya?

May plano nga maghimog balaod ang gobiyerno nga pabuhatan silag kaugalingong kasilyas. What for? Nga mga babayeg lalaki ra man na sila?

Kon unsay orihinal nilang gender, adto sila mosulod! Naglisod man ganig hatag ang pipila ka tindahan og PWD CR?

Unya, pun-an pag kasilyas para sa transgender woman ug transgender man? Pagka purihisyo!

Tingale, kon may mall nga boluntariyong mi-provide og cr para LGBT, well and good! Pero, di maayong himoog compulsory.

Ang pagpandayg balaod para mabuhatag pansayan ang LGBT, sama ra nga gihatagan silag special treatment sa kagamhanan.

Wow, kasuwerte!

Pero dako kaayong sayop!