Balita sagol panahom

Taas na unya og panahon

Adunay mga kawani sa Cebu City hall nga mahimong masuspenso o matangtang sa trabaho human masakpi sa mga kawani sa Civil Service Commission nga nagduwa lamang ug mobile games o nagpunay lang og nagpunay lang og make up bisan sa oras nga tingtrabaho. Aaw, kon masilotan gayod, aduna na’y taas nga panahon ang maong mga kawani nga magduwa o ba kaha magpunay og pintura sa ilang nawong.  Mga baga og fez jud!

Ang resulta maoy hinungdan

Mipadayag ang DPWH nga magpatabang sila sa pag-atiman sa nagkadaghan nga molupyo sa kilid sa mga kasapaan, hinungdan sa kalangay sa ilang pag-implementar sa mga proyekto nga makapugong unta sa baha sa panahon sa ting-ulan.  Wala ba diay makaamgo ang DPWH ug uban’g mga ahensya sa kagamhanan nga ang kalangay usab sa pag-implementar sa tukmang mga proyekto usa sa hinungdan ngano nga midaghan ang mga namuyo kilid sa sapa?  Ang hinungdan diay maoy resulta ug ang resulta usab maoy hinungdan.  Makalibog!

Vote buying pa more!

Nagpahigayon ang Comelec sa Cebu City og pag-purga sa listahan sa mga botante diin gipapas na nila sa talaan ang mga ngalan niadtong mga rehistradong botante nga wala na mobotar sa niaging duha ka eleksyon, kadtong mibalhin na og laing lugar, ingon man kadtong nangamatay na.  Bisan napapas na ang kapin 100 ka libo ka ngalan sa mga botante, wala kini magpasabot nga mogamay ang gasto sa kandidato.  Basin modako pa gani hinoon. Vote buying pa more!

Patay mobotar, magpatambal

Imbestigahon karon sa COA ang mokabat 2,000 ka claims sa PhilHealth nga giingon nga gihimo ginamit ang ngalan sa mga miyembro nga dugay na’ng nangamatay.  Dili na kini kahibudngan.  Kon makabotar pa ang uba’ng mga patay,  wala’y rason nga dili usab sila magpatambal ginamit ang benepisyo sa PhilHealth. Pagkatoytoy!

Kalooy sa mag-uuma

Adunay duha ka managlahing balita nga may kalambigitan sa mga mag-uuma: Una, gikataho nga mangaliyupo pa ang Department of Agriculture ngadto sa Kongreso nga mogahin og pundo aron ang NFA makakompra og humay gikan sa mga mag-uuma. Ikaduha, gi-veto sa Presidente ang balaodnon mahitungod sa paggamit sa Coconut Levy Fund. Taas na kaayo ang panahon nga nag-antos ang mga mag-uuma apan padayon gihapon ang paglangan-langan sa atong kagamhanan paghatag sulosyon sa mapait nga kahimtang ug suliran sa mga mag-uuma. Subo palandungon!