Balik na sad og dakop

Kusganon’g  miawhag si Senador Franklin Drilon sa Department of Justice sa pagpetisyon sa korte aron dakpon pagbalik kadtong 1,914 ka mga binilanggo nga nabuhian na gumikan sa pag-implementar sa GCTA Law.  Nakapahinumdum kanako kining sitwasyona sa usa ka dula sa entablado diin duha ka “Yawa” naglalis kay nakabuhi ang mga tawo nga ilang gidani ug gilaang Aron maadto sa impiyerno.

Matud pa sa usa ka Yawa ngadto sa iyang kauban: “Pagkatonto gyud nimo, imo na kadtong gikuptan, imo pa gayod nga gibuhian”!  Na hala DOJ, dakop na sad og balik!

Akong sugo, akong sugot

Tungod sa nagkagrabe nga trapik sa Metro Manila, mipadayag ang MMDA nga nagkinahanglan sila og mga lab-as nga ideya gikan sa publiko kon unsaon pagsulbad ang suliran sa trapiko. Mandato man unta sa MMDA ang pagmugna’g mga pamaagi ug polisiya sa pagsulbad sa trapiko apan mora man og gibalik hinuon nila sa publiko ang maong tahas. Mao ba kini ang giingon sa akong inahan nga: “Akong sugo, akong sugot”.  Pagkatoytoy!

NFA, way pagpakabana?

Taliwala sa nagmahal nga presyo sa bugas, miangkon ang National Food Authority nga adunay upat ka milyon ka sako’ng bugas ang anaa natanggong sa ilang mga bodega mao nga dili pa ang ahensya makapangompra og bugas sa mga lokal nga mag-uuma.

Gumikan ba kaha sa pagpabaya sa mga kawani sa NFA, tataw na kaayo nga midaug ang cartel sa mga magpapatigayon sa bugas batok sa mga mag-uuma niining sitwasyona. Na hala, kamong taga-NFA, Paugat pa more!

Wa masayod ang pikas bukton

Buot na nga undangon sa DPWH ang kontrata tali sa ilang ahensya ug sa kontraktor nga gitahasan paghimo sa ‘under pass’ ug ‘road widening projects’ diha sa Mandaue City, gumikan sa pagkadiskobre nga gipalsipikar diay ang track record sa maong kontraktor nga aduna kini nahuman nga dakong proyekto sa Eastern Visayas apan sa tinouray wala diay.

Ngano kaha nga wala man masayod daan ang DPWH niining maong bakak nga ang ilang ahensya man unta ang implementor sa mga proyekto nga sama niini? Literal ra ba kaha ang ilang pagsabot sa giingon sa Bibliya nga “Ayaw pahibaw-a ang tuo nga kamot sa gibuhat sa wala nga kamot’! Pastilan no?