Pagsabotahe sa BRT
Ang kalangay sa pagpatuman sa Bus Rapid Transit (BRT) sa dakbayan sa Sugbo usa lang sa masulob-on nga mga timaan sa nagkamang nga pagpatuman sa gipasigarbo pag-ayo nga Build, Build, Build program sa pamunoan ni Presidente Rodrigo Duterte.
Gilista isip usa sa 75 ka flagship infrastructure projects nga giisip nga “high-priority” kay “high-impact” tungod sa kadaghan sa katawhan nga makapahimus, ang BRT gipasalig nga kasugdan na karong tuiga ug magamit na sa 2022.
Apan nakaplagan sa Commission on Audit (COA) nga ang istorya dako og kalainan sa aktuwal nga nahitabo.
* * *
Gibutyag sa COA nga siyam ra sa 75 ka proyekto ang nasugdan sa ikatulong tuig sa pamunoan. Kini bisan sa pasalig sa Malakanyang nga lahi sa nangagi nga mga pamunoan mas paspas ang pagpatuman sa higanteng mga proyekto nga gitumong sa pagpalambo sa nasudnong ekonomiya.
Napamatud-an sa COA nga ang underspending nga gibasol sa kalangay sa mga proyekto sa pamunoan ni kanhi Presidente Noynoy Aquino wa masulbad ug gani nisamot pa sa pagbanos ni Presidente Duterte. Sa ato pa, nigrabe ang ka-inutil sa mga buhatan sa gobyerno pagpatuman sa mga proyekto.
* * *
Abtik ang Department of Transportation (DOTr) nga nitulisok sa kadaghan sa natanggong nga mga proyekto sa niaging pamunoan nga maoy dakong hinungdan nga wa sila kapatuman sa mga proyekto sa tukmang panahon.
Apan sa kaso sa BRT sa Dakbayan sa Sugbo, ang DOTr di inosente nga nakasawo sa kalangay. Sila ang nipasamot sa kalangay.
Gisuspenso ang proyekto kay gisubli. Karon ila na gyong giusab ang naaprobahan nang mga detalye ug busa nameligro nga mobalik sa uno.
* * *
Sakto ang privilege speech ni Kongresista Raul del Mar sa niaging semana nga niawhag sa House Committee on Transportation sa pagsusi kon ang kausaban sa BRT nga gibuut-buot og pahibawo sa DOTr may pagtugot ba sa Investment Coordinating Committee (ICC) sa National Economic and Development Authority (NEDA), World Bank-IBRD (International Bank for Reconstruction and Development), Clean Technology Fund (CTF) ug sa Agence Française de Développement (AFD).
Ang BRT usa lang sa nakaplagan sa COA nga 153 sa 159 ka proyekto nga balor og P58.9 bilyones nga nalangay o wa mapatuman tungod sa nag-usab-usab nga mga lagda sa DOTr.
* * *
- Latest
