Trahedya sa dagat

Niining atong nasud nga naglangkob og liboan ka mga isla, normal na ang mga aksidente sa kadagatan. Gani sa nanglabay nga mga siglo, dili na maihap ang nagkadaiyang trahedya nga naglambigit sa mga barko.

Sa niagi lamang mga adlaw, duha ka insidente sa kadagatan nga naglangkob sa mga pasaheroan nga barko ang nahitabo dinhi sa nasud.

Ug adunay gyuy mga kinabuhi nga nakalas ug dakong kantidad sa mga propriedad ang nahanaw.

Sa unang insidente, tulo ang patay sa pagkasunog sa usa ka passenger vessel niadtong gabii sa Martes. Ang maong barko duol na unta modunggo didto sa dakbayan sa Dapitan sa northern Mindanao gikan sa southern Cebu dihang nahitabo ang insidente.

Maayo ug walay sami ang paglawig sa Lite Ferry 16 sa Lite Shipping Corporation sa alas sayes sa gabii sa Martes.

Dili kini overloaded tungod kay insakto lamang ang mga pasahero ug mga kargamento.

Apan unsa bang hitaboa nga kalit lamang nga miulbo ang sunog nianang pagka-alas onse sa gabii nga kondisyon ug bag-o man unta kuno kadto nga barko.

Gawas sa tulo nga namatay, adunay pipila ang naangol sa maong insidente.

Sa ikaduhang insidente, usa ka barko sa Jomalia Shipping Lines ang mitakilid sa dihang nag-angkorahi kini didto sa Barangay Consuelo, San Francisco sa isla sa Camotes. Maayo na lamang kay walay naangol sa maong insidente.

Sa unang insidente, napuno sa kritisismo ang Philippine Coast Guard tungod sa ka kulang sa paningkamot niini pagresponde dayon sa nagkayong barko. Kini bisan pa man kun duol na ang hitabo sa pantalan.

Kun aduna may imbestigasyon nga ipahigayon ang otoridad ning maong insidente, duha ka isyu ang angay nilang tuhogon:

- unsang sirkumstansiya sa pagkasunog sa barko nga kondisyon man unta kini ug usa kini sa mga bag-o sa kompanya.

- nganong nagmika man ang Coast Guard sa pagresponde niini sa insidente.