DPWH mipakyas, Samsam miawas

Batan-on pa si Talisay City Mayor Gerald ‘Samsam’ Anthony V. Gullas Jr. Lagsik pa kaayo ang panghunahuna ug panglihoklihok diha sa seryoso niyang pagpangalagad sa katawhan sa dakbayan, kinsa bulahan nga nakaangkon og usa ka amahan nga pirmeng naghunahuna unsay maayong buhaton nga makatabang pagsulbad sa mga inadlawng panginahanglan sa mga lumolupyo, kinsa gipakasama niyang mga mahal sa iyang kinabuhi.

Gikan sa school supplies hangtod na sa wheelchairs, mga pipila lamang kini kapudyot sa daghang bililhong butang nga iya nang nahatod-patagamtam ngadto sa mga kabos nga nanginhanglan.

Usab, problema sa trapiko, gipaningkamotan pagpangitag epektibong paagi ni Samsam unsaon sa pagsulbad.

Mao nga hagbay ra niyang gimandoan ang Department of Public Works and Highways (DPWH) nga dalion paghuman ang dugay nang giayong Mananga Bridge sa Barangay Tabunok, siyudad sa Talisay.

Kini aron maagian na sa mga gagmay ug dagkong behikulo nga hagbay rang nag-antos sa nadugang taas mga oras sa pagbiyahe paingon ug gikan sa South tungod sa grabeng problema sa trapiko nga nahatag sa pagkaaberiya sa Mananga Bridge.

Nagtuo si Samsam nga nagkasabot na silang taga DPWH, diin sa gikatakdang adlaw nga ilang gikasabotan, unang semana sa Agosto, mahuman na kini. Gani, in advance, iya na kining gianunsiyo sa publiko.

Apan naunsa ba, nga hangtod karon, ning akong pagsulat, Agosto 31, dili pa gihapon maagian ang usa ka taytayan.

Wala na makapugong si Mayor Samsam sa iyang kaugalingon. Sama sa usa ka baldeng tubig nga puno na kaayo, miawas gyod ang kataas sa iyang pasensiya ug nahimong kapungot.

Matod niya: “Wa ko kasabot nila. Ilang giayo ang bridge kay naay cracks, unya karon nga ila nang giayo, naa lang gihapoy cracks. I don’t know, what’s really happening?”

Gumikan niini, nagplano siya nga ipaabot kining hitaboa ngadto ni Secretary Mark Villar. Buwahan, maibestigahan ang kontraktor ug DPWH kon unsay gyod ang nagpahiping dakong hinungdan?

Nakapasalig na man god sa batan-ong mayor sa publiko nga first week of August, mahuman-maagian na ang Mananga Bridge.

Apan nahimo siyang bakakon, kay wala man matinuod iyang gisaad.

Gipakyas man siya sa DPWH kang kansang sakyanan, usa ka higayon, gidakop sa CT-TODA kay miparking sa gidiling lugar.

‘Yon, lang!