Barko on fire!

Tulo ka kinabuhi ang nakalas sa pagkasunog sa Lite Ferry 16 didto sa kadagatan sa Dapitan niaadtong nakalabayng mga adlaw.

Migikan ang barko sa pangtalan sa lungsod sa Samboan dinhi sa Sugbo luwan ang mokapin sa 200 ka mga pasahero ug tripolante.

Giklaro sa Coast Guard Cental Visayas nga dihang migikan ang barko sa Samboan gipaubos kini og makuti nga pagsusi sa wala pa tugoti nga makabiyahe.

Lakip na sa gisusi kun pila ka mga pasahero ang sakay busa naseguro sa Coast Guard nga walay nahitabo nga overloading sa mga pasahero.

Wala usay mga kontrabando nga nakalusot tungod sa kahigpit sa seguridad nga gipatuman.

Apan unsa man nga pagkaunsaa nga nahitabo ang trahedya? Una ang mga tripolante sa barko ug ang mga opisyal unsa man ang ilang gibuhat?

Giingong nagsugod ang sunog sa engine room sa barko, syaro wala mabantayi ang pag-aso hangtod na sa pagsilaob sa kalayo?

Wala ba diay silay gi assign nga watch man o tigbantay sa makina nga vital part kaayo kini sa barko?

Ayaw ko ingna nga dako na daan ang kalayo sa pagsugod pa lang, kay kon yanong sunog lang mapalong ra seguro oy kon mabantayan lang.

Gawas lang siguro og natulog o nagpabaya ang mga crew sa barko maong misilaob gyud ang sunog.

Dili usag layo ang posibilidad nga naay mas lawom nga hinungdan sa sunog nga basin nag gikan sa usa ka butang nga delikadong mobuto.

Pangagpas lang ni apan gikinananglan nga masuta pag maayo sa mga otoridad ilabi na karon nga dunay mga hulga sa seguridad.

Samtang lakip sa tan-awon nganong wala dayon nakaresponde ang coast guard sa Zamboanga del Norte nga naunhan pa man sila sa mga pribadong barko nga miluwas sa mga pasahero?

Igo ra gyud ta sa mga pangutana ani nga unta mahatagan og katin-awan human unya sa gipahigayong imbestigasyon.