Nausab na gyud ang tanan

Ang tawo karong panahona mahilig sa mga panaad ug panumpa apan ang maong mga panumpa mahimong ibanlas lamang sa balod sa kalimot. Dunay mga hinungdan kun nganong malubong sa kalimot ang usa ka tawo nga kanhiay nahimong mahinungdanong kabahin sa imong kinabuhi. Mahimong kini ang mga hinungdan:

1. Una, tungod kay ang imong pagkamatinud-anon kaniya nga giisip mong mahinungdanon sa imong kinabuhi mahimong mosukli niini og pagluib.

2. Ikaduha, tungod kay ikaw mismo ang nahimong maluibon kaniya nga nahimong nagmatinud-anon kanimo.

3. Ikatulo, nahimong sakit alang kanimo ang maong kasinatian uban sa maong tawo o mga tawo mao nga imo silang ilubong sa kalimot nga maoy bugtong paagi aron mabatonan mo ang kalinaw gikan sa maong traumatic nga kasinatian.

4. Ikaupat, nahimong daghan ang imong kapilian nga tungod niini buot nimong sulayan ang bisan unsa nga anaa sa imong palibot. Sa laktod nahuptan mo ang kalibog.

5. Ang imong kinabuhi nahimong nakaisdog ngadto sa laing hugna sa iyang kahamtong.

Sa dihang nitambong ko sa usa ka pangilin akong gikahibalag pag-usab ang linalang nga nahimong mahinungdanong kabahin sa akong kinabuhi kanhi. Apan imbis buhian ko ang tam-is nga pahiyom, nagpabiling blangko ang tanan alang kaniya ug kanako.

Daw nahimong kanhiay lamang ang higayon sa dihang puno sa gitawag natong kalipay ang tanan apan karon nahimong puno na kalimot.

Nalumotan na ang kanhiay nga paraiso dili tungod kay buot langkaton sa panumdoman kadtong higayona. Apan karon nia, gitubos sa daklit nga kasagmuyo ang pinitik sa mga luha sa pagbasol kun nganong siya gikahibalag pa.

Ang linalang nga naghatag sa di tinuod nga paglaum. Apan human sa tanang drama gitungab ang kupa sa binong makahubog aron saulogon ang kagawasan gikan sa urom sa maong way hinungdang relasyon.