Trust issue

Bisan giunsa og tago apan misihag gyud ang timailhan nga dunay nagpahipi nga kakulian sa relasyon nilang Cebu City Mayor Edgardo Labella ug Bise Mayor Michael Rama.

Biyernes sa miaging semana dihang giluwatan ni Labella ang Executive Order alang sa katukoran sa Sinulog Governing Board. Ang naasoy’ng hunta dunay tahas pag-supervise sa mga kalihukan sa Sinulog Foundation Incorporated diin si Rama maoy chairman. Matud sa mayor nga buot niyang protehian ang interest sa syudad sanglit dako kini og gasto matag tuig pagpahigayon sa nabantog nga Sinulog Festival.

Nunot niini mitumaw ang pangutana, kuwang ba og pagsalig si Labella sa iyang bise mayor ug kapartido nga si Rama? Angkonon man ni Labella o dili apan tataw nga duna siyay “trust issue” kang Rama.

Abunda ang mga timailhan sa pagduda nga niaslom na ang relasyon sa duha sukad pa niadtong eleksiyon.

Una, nganong kinahanglanon ni Labella ang Sinulog Governing Board nga iya mang kauban ang chairman sa SFI? Ikaduha, nganong  gililong ni Labella kang Rama ang iyang plano pagtukod sa Sinulog Board?

Matud ni Rama nga wala siya pahibaw-a ni Labella sa wala pa moluwat og executive order. Wala gyud gani siya konsultaha mahitungod niini.

Nagdumili si Rama pag-angkon apan tataw nga siya nahimangod ug nainsulto sa gibuhat ni Labella. Sinugdanan naba kini sa pagkasi-ak sa Partido Barug?

Nahulga na ba og sugod si Labella kang Rama nga posibleng maoy mamahimo niyang higpit nga karibal pagkamayor sa 2022 nga eleksiyon?

Ang kasaligan nakong tinubdan mitug-an nga insecure si Labella ni Rama. Unsaon nga karon palang ang grupo ni Rama gikatahong nagsugod na paglatag sa ilang mga plano sa mosunod nga eleksiyon.

Busa dili imposible nga sila maoy mag-atbang labi pa nga dunay kaugalingong balwarte si Rama.

Kana kun way mausab sa mga plano nga si Labella mobalik pagka-bise mayor sa 2022 tungod kay dunay laing kandidato nga ituboy si Presidential Assistant for the Visayas Michael Dino nga maoy nagpaluyo sa kadaugan ni Labella sa miaging election.

Duna sab hinuoy mitumaw nga mga pangagpas sa posibling pag-uban og balik ni Rama ug ni kanhi mayor Tomas Osmeña. Dunay panultihon nga sa politika way permaninting higala ug kontra busa bisan sa nahitabo dili gyud kini imposible.