Ban sa mga baboy

Aduna nay ban sa mga baboy ug mga produkto gikan sa karneng baboy nga gipatuman sa kagamhanan sa lalawigan sa Sugbo.

Kini pinaagi usab sa executive order nga giluwatan ni Gobernadora Gwendolyn Garcia sa niaging semana.  

Ang maong order nagdili pagsulod sa mga baboy ug mga pork products sa probinsiya sulod sa 100 ka adlaw. 

Hinuon kadtong makasulod nagkinahanglan nga adunay permit gikan sa otoridad nagpamatuod nga limpiyo kining maong mga produkto.

Ang ban naggumikan sa African Swine Flu nga miigo karon sa ubang kanasuran.

Mao nang miimplementar na og ban ang nasyonal nga kagamhanan sa mga baboy ug mga pork products gikan sa 20 ka nasud.

Kining maong nasud mao ang China, Mongolia, Vietnam, Cambodia, Hong Kong, North Korea, Laos, Russia, Ukraine, Czech Republic, Moldova, South Africa, Zambia, Hungary, Bulgaria, Belgium, Latvia, Poland, Germany ug Romania.

Hinuon ang ASF dili makadaut sa tawo. Kini tungod kay dili modulot ang virus niini sa atong lawas.

Apan dako kini og epekto sa swine industry sa nasud kun moigo na kining  maong virus sa Pilipinas diin mayoridad sa katawhan ang kusog mohabhab og baboy.

Sa mga taho sa media, adunay mga namatay nga mga baboy sa nasud sukad nga miulbo ang isyu sa ASF. Gani sa Cebu City, adunay tulo ka kaso sa pagkamatay sa mga baboy ang narekord sa City Agriculture Department.

Hinuon dili tungod sa ASF ang hinungdan sa pagkamatay sa maong mga baboy basi sa resulta sa mga eksaminasyon.

Gibutyag kini ni Agriculture Secretary William Dar isip pagpakgang sa mga kabalaka nga basin kuno nga nakasulod na ang ASF sa nasud.

Hinuon angay lamang nga mohimo og konkretong aksiyon ang lokal ug nasyonal nga kagamhanan aron nga mapugngan ang pagsulod sa maong sakit sa baboy dinhi sa nasud.

Apan dili gayud nato matagna ang panahon.

Kini tungod kay basin baya kun kugi usab kining mga sindikato sa ilang illegal nga importasyon sa baboy ug mga produkto niini tungod sa ka luag sa monitoring sa otoridad.