Paghimog basurahan sa sapa usa ka pagpanamastamas

Kaniadto sa elementariya pa ko, pag-abot sa adlawng Sabado, bation dayon nako ang dili matukib nga kalipay. Kay niining adlawa, magakos ko na usab ang katin-aw sa nagdagang tubig sa sapa nga ang pipila ka daplin giamboan sa mga dagkong kahoy ug kawayanan samtang ang pikas gilarayan sa mga nagkalainlaing anino, kinsa pulos madasigong mikusokuso-waswas sa mga linabhan.

Apil kaming Nanay sa mga anino. Gihimo namo kining bulawan sa among panan-aw.

Presko ang hangin sama kalab-as sa mokilab sulog nga hitandangan sa adlaw.

Ang kaanindot na lang gyod ub-an sa nagdagang sulog nga morag mga lumoyng tudlo sa masahista, mopabati sa talagsaong kaigang diha sa ilang pag-agi sa hubo namong kalawasan.

Sobra ka limpyo ang sapa nga kanunay namong dumdomon kaniadto. Gani, sa daplin, magkawot lang mig gamayng lungag, diin pagkatin-aw sa tubig maoy among imnon. Ug bisan karon, naa pa kini.

Apan ang kasapaan sa Guadalupe ning atong dakbayan, pastilan, haskang hugawa!

Unsaon, gihimo na man lang ning basurahan sa mga nanagpuyo dinhi, uy! Nanglutaw dili lang mga hugawng sagbot, kondili, hasta biyang hugaw sa mga mananap ug sa tawo.

Niadto lang miaging Sabado, Agosto 17, dihang gipahigayon ang Guadalupe River cleanup drive nga pinangulohan ni Mayor Edgar Labella uban sa 5,000 ka empleyado sa City Hall ug mga volunteers, nakahipos sila og 20 ka toneladang basura.

Apan, wala pa gani abtig usa ka semana gikan sa ilang pagpanglimpyo, may pipila gihapong aserog nawong nga nagpadayon sa paghugawhugaw sa maong dapit.

Gumikan niini, gipalanog-buhagay ni Mayor Edgar sa publiko nga iya gyong ipadakop ang masakpang manglabayg basura sa sapa ug pahamtangan sa tukmang silot pinaagi sa multa nga P1,000-P50,000.

Usab, gimandoan niya ang kadagkoan sa mga barangay ug City Environment and Natural Resources nga bantayan gyod pirme ang maong sapa aron dili na matambakan og hugaw.

Alang nako, kulang ra ang P1K-5K fine. Dapat, prisohon gyod ang malapason hangtod mahurot. Kay ang paghimog basurahan sa sapa, usa ka dakong pagpanamastamas sa maanyag nga kinaiyahang hinatag sa Diyos.

Nga imbes ampingan, giguba hinuon. Hinungdan, nga inig tokar sa bawos niini, wala gyoy bawot ang tawo.

Unsa, wa pa gyod ta motagam?