Bulawanong yugto nagmaidlas

Hulyo 31. Birthday sa akong misis. Na-admit ko sa tambalanan. Ang maanindot plano sa panag-uban tibuok pamilya sa usa ka desenting dapit aron adto saw-an ang kalipay sa pagselebrar, naguba ug nahimong simple na lang, diin mihulma sa mga panagway ang kahingawa ug kahaw-ang sa ilang pagpangaon sanglit ako nga ilang gimahal, wala man nila gikauban.

Dili gyud mapugngan ang dagan sa panahon. Sama sa dagat, pagkabuntag linaw pa.

Pero pagka-hapon kalit lang midagko ang mga balod. Tiaw bay sa nahisgotang adlaw, pagkabuntag mi-duty pa ko. Pero pagkahapon, naospital na?

Agosto 3. Mitingog ang selpon ibabaw sa lamesa nga nahimutang duol sa akong gihigdaan. Mihinay ko pagbakod, gipunit ang selpon ug giablihan ang message window.

Ug didto akong nasayran nga si Sis Inday Go, kauban kong opisyal sa Parish Pastoral Council (PPC), diay ang miteks, nagpahibalo-naningil kon andam na ba ko sa  hamubong pagpakigpulong alang sa despida party sa kaparian sa Guadalupe Parish Church nga ipahigayon inig 7pm.

Gitan-aw ko ang linya sa dextrose nga ang kinatumyan sa dagom nag-ungot pa sa bukobuko sa akong walang palad, diin wala tuyoa nabati ko na usab ang laing matang sa kahaw-ang.

Kahaw-ang sa pagpakigsandurot sa giisip ko nang pamilya sa simbahan ning talagsaong yugto nga dapat atua ko uban nila ug sa kaparian, kinsa manamilit na, mobiya na sa among parokya aron mobalhin-panaw ngadto sa laing dapit aron magpadayon pagtanom og langitnong gugma sa kasingkasing sa katawhan sama sa ilang gipasinati namong mga parokyano sa Guadalupe sulod sa hapit motulo ka tuig nilang pagpangalagad.

Kinsa bay dili mawili sa ilang pagka sila? Gani, ang iro nga igo lang namong agi-agian kada PPC meeting, mokitoykitoy man ang ikog timaan sa tumang kahinangop.

Unsa na kaha silang kaparian nga kanunay namong ikauban diha sa ilang pagmisa ug sa among binulang PPC nga panagtigom?

Wa gyud ko makatambong sa maong okasiyon. Ug labaw nang wa ko mapabati sa kaparian ang giandam kong farewell speech nga naglarawan sa mga sulondong tunob nga ilang gibilin sa tagsatagsa namo ka kasingkasing.

Gusto ko silang gakson aron pasalamatan. Apan pakyas. Kay gihawiran man ko sa kutay sa dextrose ug oxygen didto sa ospital.