Dili maayong panig-ingnan
Miawhag ang kahugpungan’g Alliance of Concerned Teachers (ACT) sa Kongreso nga imbestigahon ang giingon sa COA nga anomaliya sa pagpamalit sa DepEd og mga textbooks ug uban nga instructional materials.
Kon ang institusyon sa edukasyon na mismo ang si-aw, makapaabot kita nga ang atong kabataan unya maoy mahimong latagaw. Makapabalaka kini nga panig-ingnan nga gihimo sa DepEd!
Masayop man gani ang kabaw
Taliwala sa kontrobersya nga naglimin sa anomaliya sa DepEd kansang mga pinalit nga libro ginaingon nga nabulit sa daghang sayop, mitubag lang ang usa ka opisyal sa DepEd ginamit ang linya sa usa ka awit nga nagkanayon: “Sapagkat Kami ay Tao Lamang”. Aw, masayop pa man gani ang kabaw nga upat ang tiil, ang tawo pa ba kaha. Ang nakaparat lang kay gatosan ka milyon ka pesos ang kantidad sa maong sayop. Faeetz!
Trespassers not allowed
Bisan sa nagsunod-sunod nga notisya, nagmakuli gihapon si Rep. Paz Radaza pagtuman sa awhag kaniya pagbakante sa iyang buhatan sa Lapu-lapu City Hall. Talagsaon ang maong matang sa panagbangi kay ang nagkaatbang mao man ang Magbabalaod ug ang Tigpatuman sa balaod. Kay miabot na man sa korte ang maong panagbangi, dili ba kaha unya butangan og paskin ang atubangan sa buhatan nga nagkanayon: “This Office is under litigation. Trespassers are not allowed”? Nangutana lang!
Padayon gihapon sa pagpanugal
Nabuhian na ang kapin sa 300 ka sugarol nga nadakpan atol sa ronda sa buwangan dapit sa Mandaue City human nila maserbisyohi ang silot sa maong salaod nga mapriso og dili momenos 3 ka adlaw. Bisan pa man niining maong kasinatian, miangkon ang ubang nadakpan nga mobalik gihapon sila sa buwangan apan sa adlaw’ng Dominggo na lang. Basta sugarol, magkatol jud ang lapa-lapa kon dili makapanugal. Bisyo pa more!
Labing maayong magtutudlo
Tungod sa nahitabong pagronda sa buwangan sa Mandaue City, naglaraw karon ang Konseho sa Danao City nga amendahan ang odinansa sa siyudad nga nag-regulate sa operasyon sa mga buwangan. Dili tingale buot sa mga opisyales sa Danao City nga masinati sa mga sugarol didto ang nahitabo sa Mandaue. Tinuod gayod diay nga “ang labing laksot nga kasinatian maghatag og labing maayong pagtulon-an”.
- Latest
