EDITORYAL - Modernong Coast guard

Dako kaayo ang papel sa Philippine Coast Guard mao nga kinahanglan nga aduna silay hustong mga gamit aron mabuhat ang ilang mandato isip magbalantay sa kabaybayonan, tigluwas panahon sa kalamidad ug tigprotihir sa kinaiyahan sa kadagatan.

Ang Philippine Coast  Guard mao ang kinakaraanan ug nag-inusarang humanitarian armed service sa Pilipinas nga gitukod niadtong 20 siglo isip tigbantay sa kabaybayonan ug mga pantalan ug sa paglabay sa mga katuigan nidako kini isip usa ka organisasyon ug ubos na karon sa Department of Transportation.

Sayo niining buwan sa Agusto nakasinati ang nasud og grabeng epekto sa hanging habagat nga gidunganan pa gyud sa pagtapsing sa bagyong Hanna. Wa man tuod motugpa sa kayutaan ug dili kusog ang bagyo apan lapad kaayo ang naapektahan sa hinay nga uwan nga dala niini.

Tungod niini daghang mga biyahe sa mga gagmay nga mga bangkang pasaheroan nga magtaboktabok sa mga isla ang wa makabiyahe.

Hinungdan nga dunay mga isla sama sa Olango sa Dakbayan sa Lapu-Lapu ang nahutdan og mga supply sa pagkaon, tubig, krudo, tambal ug uban pang batakang panginahanglan. Pinaagi ni Mayor Junard “Ahong” Chan ug sa Coast Guard Central Visayas nahatdan og supplies ang maong mga isla.

Apan di kadto molampos kun ang Coast Guard karon mao gihapon ang estado sa kaniadto napulo ka tuig na ang nakalabay nga limitado ang gidaghanon sa moderno ug dagkong mga barkong makaatraka og dagkong bawod. Angay pasalamatan si Pres. Duterte nga sa iyang pagpuli kang P.Noy gipadayon niya ang naplano nang daan nga gustong paliton sa Armed Forces of the Philippines apil na ang sa PCG.

Gawas sa napulo ka 44-meter Parola Class nga mga barko gikan sa Japan sa panahon ni P.Noy nga nakompleto’g hatud sa panahon na ni Duterte, umaabot na sab ang usa ka 84-meter Offshore Patrol Vessel nga gikan sa France nga makadugang sa pwersa sa PCG.

Kinahanglan pa kining madugangan aron epektibo nilang mabuhat ang ilang mandato sa maritime security, environmental protection, search and rescue ug isip kaabag sa AFP.

LEGAL CORNER Atty. Divine Marcial-Flores

Gisirad-an ang agianan sa bag-ong tag-iya sa yuta

Dear Atty. Divine,

Duna koy napalit nga property sa probinsya ug ako na kining gisugdan sa pagtukod og balay. Karong bag-o gipahibawo ko sa  mga trabahante nga maglisud na  sila sa pag-agi hasta ang among mga materyales kay gisirad-an ang among road right of way sa bag-ong nakapalit niini. Sa wa pa nako palita nang yutaa mipasalig ang seller nga duna mi kaagian. Karon nga lain na ang tag-iya sa yuta iya nang gisirad-an ang among agianan. Duna ba mi katungod nga mo-demand og agianan? Unsay angay namo nga buhaton? Daghang salamat. —Danny

Dear Danny,

Kun wa moy laing kaagian aduna gyud moy katungod nga mo-demand og road right of way. Basi  sa Article  649 og Article  650 sa atong Civil  Code nga diin kini nagkanayon nga dunay katungod nga mo-demand og right of way ang usa ka tawo kun wa na silay laing kaagian ug kun ang maong  agianan maoy labing short cut or shortest way padung  sa highway. Ang una nimong buhaton mao ang pagpakigsulti sa new owner kun di madala og hangyo then mamahimo ka nga mopasaka og reklamo sa barangay ug kun di mo mahusay sa barangay then pwede ka nga mo-file og kaso sa korte aron pagpugos  sa owner paghatag kanimo og agianan. Thanks and God bless. —Atty. Divine

* * *

Alang sa inyong pangutana, ipadala lang sa legal corner sa Banat News sa V. Gullas St. Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.