Tilapia mipatay og tawo

Usahay ang tawo kumpiyansa ra kaayo. Nagtuo nga ang gagmayng isda sama sa tilapia sayon ra nga kontrolahon oras nga madakpan kini.

Busa mahimo rang tangagon-sipitan sa mga ngabil sa nangisda ang usa nga nakuha samtang magpadayon siya sa pagpanakop og lain.

Usa ka Roger Marcelino, hamtong na, taga Sitio Dam Village, Tagudtud South, Bugasong, Antique Province, nanguhag tilapia sa Paliwan River nga duol ra sa ilang balay.

Sumala pa sa iyang asawa nga nahimo nang kinaiya ni Roger ang pagbutang sa nadakpang isda ngadto sa iyang baba aron makadaginot og oras sa pagpanikop pag ubay-ubay.

Taudtaod na niya kining gipraktis. Apan naunsa ba, nga mao na man lay namatikdan sa asawa, ang pagdalig uli sa iyang bana sa ilaha, diin maglisod na pagginhawa. Kay diay, ang isdang tilapia nga may mga tunok o silik nga nagtuybo sa bukobukong bahin sa lawas niini, miali sa tilaokan ni Roger nga maoy nakapugong sa iyang pagginhawa.

Nagtuo ang asawa, nga basig pag-um-om-tangag ni Roger sa nakuha niining tilapia, mikisikisi pag-ayo ang himbisong isda ug aksidenting misuksok-natulon kutob sa tilaokan sa iyang bana.

Gisulayan sa mga kabanay ug silingan ang pagkuha sa miungot nga isda, apan pakyas sila.

Ang nakademalas, kay matud pa, hinay kuno ang signal sa selpon sa maong lugar ug nadugay ang pag-abot sa ambulansiya nga gustong moluwas sa gikuyapan nang biktima, kinsa gideklarar nga patay na pag-abot sa Bugasong Medical Hospital.

Dinhi gimatuod nga gamit gyod unta kaayo ang kusog ug paspas nga linya sa telecommunication.

Apan adunay mga dapit ning atong nasud nga hangtod karon, hinay ug mag-awop-awop gihapon ang signal sa ilang mobile phones.

Niining bag-o, gipahurar na ni Pres. Rodrigo R. Duterte si kanhi Senador Gregorio ‘Gringo’ Honasan, isip bag-ong sekretaryo sa Department of Information and Communication Technology (DICT).

Misaad si Honasan nga iyang panindoton ang daw nagkamang nga dagan sa koneksiyon sa internet ug uban pang matang sa telecommunication dinhi sa ato, agig sanong sa sugo ni Duterte.

Hinaut unta nga matuman ang ilang gisaad sa labing dali nga panahon.

Bulahan kon may susamang disgrasya nga mahitabo niadtong nangisda nga namatay tungod lang sa tilapia, mahatagan og taas nga tsansang maluwas.