Ang human trafficking

Sobra sa 30 ka mga Insik ang naluwas sa mga sakop sa National Bureau of Investigation-7 sulod sa usa ka bar sa dakbayan sa Lapu-Lapu pila ka adlaw na ang nakalabay. Gidakop usab sa NBI-7 ang upat ka langyaw nga mga Insik human kini malambigit sa human trafficking nga usa ka kasong kriminal.

Kaniadto ang mga Pinoy lamang ang nabiktima sa human trafficking. Mga Pinoy usab nga nakigkumboya sa mga langyaw ang mibiktima kanila. Karon mga langyaw na gayod ang biktima sa lain usab nga mga langyaw.

Ang human trafficking ang gikonsiderar nga usa sa labing dako og kita nga organisadong krimin sa kalibotan nga mokita og hapit moabot sa 32 bilyones dolyares matag tuig.

Ang trafficking usa ka krimen nga nanginlabot sa pagdala ug pagbalhin og mga tawo. Mahimo nga kontra kini sa gusto sa biktima o pinaagi sa pag-ilad kaniya o ba kaha pinaagi sa pagpahimus sa pagkahuyang sa biktima.

Ang ultimong tumong sa trafficking mao ang pagpahimus sa isig ka tawo. Kasagaran sa mga nabiktima sa trafficking gipahimuslan pinaagi sa pakighilawas. Duna usay uban nga gi-traffick aron patrabaho-on nga way bayad.

Sigun sa balaod nga Akta Republika 9208 nga naila nga The Anti-Trafficking in Persons Act of 2003) gikonsiderar kining mosunod nga trafficking in persons: Pag recruit, pagdala, pagbalhin o pagtago, pagdawat sa mga tawo (mahimo ug di sa ilang pagtugot) sulod ug gawas sa nasud pinaagi sa mga matang sa paghulga, gamit ang kusog, ug laing pamaagi sa pagpamugos, pagkuha, pagpangilad, pag-abuso sa gahum ug katungdanan, pagpahimus sa kahuyang sa usa ka tawo sa ilang di maayong tumong sama nalang sa prostitusyon (ug laing susamang pangabuso), pinugos nga panarbaho, paghimo nilang suluguon ug ang pagkuha ug pagbaligya sa parte sa lawas sa ilang nabiktima.

 Dako ang posibilidad nga mao pod kini ang gidangatan sa mga langyaw nga Insik nga naluwas sa mga sakop sa NBI-7.