Deus Providet

Di ikalimod nga daghan nato ang mahimong mahangawa sa atong dangatan kun ugaling dili mahimong makab-ot nato ang atong gipangandoy labina kun dunay mga higayon nga sa atong pagpuyo nasanapan kita sa mga butang nga kanato nakapabilanggo. Maglisud kita og let go kanila ug gani ato mang gihimong kabahin na gyud sila sa atong kinabuhi.

Ning paagiha nahimo kitang ulipon ug binilanggo mismo sa bilanggoan nga kita ang naghimo. Ning maong paagiha mahimong daw sa mohinay kita ug malisud alang kanato ang pag-move on sa laing padulngan sa atong panaw sa kinabuhi. Mao nga malisud gyud tuod ang pag-let go labina kun nahilansang na gyud kita niini.

Apan ang kasinatian sa kagawasan mamahimong maundang kun ugaling anaa ang tinguha sa kaugalingon lamang.

Apan kun atong iangkla ngadto sa Dios ang tanan, nan mamahimong malig-on ang atong panaw ug galamhan. Siyempre sa Dios dili kita pasagdan.

Mapasalamaton kaayo ko sa taga Mohon bisan pa man kun sa tinuod lang gimingaw nako ninyo apan ang kinabuhi padayon nga molatas segun sa iyang latid aron tagamtamon ang laing hugna ug anib sa pagkinabuhi. Nalipay ko nga nahimo kamong kabahin sa akong panaw ug nalipay usab unta kamo sa atong panaghigalaay.

Sa dihang ninaug ko sa taxi ug himamaton ang taga Sangi, nisantop sa akong hunahuna ang laing hugna sa panaw sa kinabuhi. Tinuod anaa ang mga kahadlok ug kabalaka apan sa laing bahin gibati ko ang tumang kalipay nga ning maong laing hugna sa pangalagad ang tanan mabutang lamang sa hustong perspektibo.

Nindot ang palibot angayan sa pag-ampo. Ning maong kahimtang akong nakita nga maayo gyud ang Dios tungod kay may mga tawo nga bisan pa man sa ilang kayano manggihatagon kaayo sa ilang kaugalingong panahon. Unsa pa may akong mahimo? Nan, angayan lamang nga bugtian ang maong kaayo pinaagi sa pagminaayo ug pagtinarong diha sa panerbisyo.

Lisod ug hagip-ot tuod ang panahon apan way kuomo sa pagkamanggihatagon. Sayud ko nga ang Dios mohatag dili lang sa mga butang nga sobra kondili sa mga butang usab nga mahinungdanon...... God will provide! Deus Providet!