Unsay tigomon kon wa’y gastohon?

Segun sa pagtuon sa usa ka life insurance firm, ang babayeng Pilipinhon maampingon nga mogasto sa kuwarta apan dili kuno maantigo mogahin alang sa kaugmaon.  Nasayran gikan sa pagtuon nga sa matag lima ka babaye, usa lamang kanila ang adunay tinigom. Lisod na ang panahon karon, daghan way trabaho, kon may trabaho man, gamay ang sweldo apan mahal ang mga palaliton.  Matud pa bitaw sa akong silingan, “Nah, wa gani kuwarta gastohon, magtigom na hinuon!” Faeetz!

Ngano’ng ni-enter

Gikataho nga adunay grupo sa mga private haulers nga interesado nga mo-backfill sa nakalot ngaa lugar diin ang P1.8B nga Provincial Resource Center gilaraw nga pabarogon.   Gamiton sa mga private haulers ang mga kinalot nga mga yuta sa ubang mga proyekto ug kini ihatag ug buhaton nila nga walay bayad.  Bisan pa man niining maong kalamboan, mipadayag si Gobernador Garcia nga wala pa malibre sa kabilinggan ang kontraktor sa naasoy nga proyekto. Sa ato pa diay, matabunan ang lungag apan dili maapil sa pagtabon, labaw nga dili malubong sa kalimot, ang mga kaakuhan ug kabilinggan sa kontraktor.  Ngano’ng ni-enter?!!!

Libre ang pagpangandak

Gibutyag sa COMELEC nga aduna’y laraw ang ilang buhatan sa pagpanghatag ug Voter’s Identification Card ngadto sa mga OFW agi og pagsanong sa ilang (OFW) hangyo.  Matod sa COMELEC, mahimo’ng unahon pagtagad ang ID sa mga OFW kay diyotay ra ang ilang gidaghanon.  Wala pa gani matiwas sa COMELEC pagpanghatag ang mga Voter’s ID sa mga narehistro niadto’ng nangagi nga eleksyon,  mangandak na usab sila niining bag-ong kaakohan. Pag-sure lage mo COMELEC uy!!!

Chicken with “small bolo”

Sa gipahigayon nga pag-ronda sa CIDG sa usa ka buwangan sa usa ka barangay sa Mandaue City niadtong Agosto 5, 2019, gikataho nga kapin sa 200 ka tawo ang nadakpan ug natanggong karon sa bilanggoan. 

Gi-apil pag-confiscate ang mga manok ug kwarta nga gipusta atol sa sultada isip mga ebidensya. Nakapahinumdum kini kanako sa susamang insidente kaniadto. Mao kini ang napatik sa police blotter: “Conduct raid at cockpit, confiscated chicken with ‘small bolo’ in feet.” Sa ato pa, “Mihimo og ronda sa buwangan, naka-kompiskar og manok nga aduna’y tari sa iyang tiil! Pagkatoytoy!!!