Ihatag kang Cesar ang iya kang Cesar

Binalhinay na mao nga andam ug tagana ang tanan diha sa pinustanay sa mga dad-onong kahimanan sa debosyon ingon man gikinahanglanon aron mabuhi sa sunod nga padulngan.

Mao nga sa akong bahin gihimo ko ang pag-imbentaryo sa mga butang nga akoa ug sa mga butang alang kang Pedro Calungsod sa Mohon, Sogod, Cebu. Mao nga putos dinhi, lahi didto, lihok dinhi, lihok didto. Sa akong bahin nahimong daw tulokibon ang tanan kay nisulod ka dinhi nga walay makita ug mobiya ka dinhing dapita nga duna nay makita.

Dako kaayo ang akong pasalamat sa mga tawo nga bisan sa kahagip-ot sa panahon ang nihatag gihapon sa ilang kaugalingon matabangan lang ko sa akong panaw mao nga ang maong kamanggihatagon nakat-onan ko ingon nga akong sukaranan sa pagkahimong manggihatagon usab ngadto sa uban.

Sa linain nga paagi akong pasalamatan ang tanang mga Sogoranon pinangulohan nilang Mayor Richard ug Vice Mayor Monyeen, sa taga Mohon nga kanako nibulig ug nitabang ug nahimong kabahin sa akong kinabuhi. Usbon ko di man tuod ko hingpit nga pari alang kaninyo apan naningkamot ko nga makahatag ingon sa angay sibo sa akong kahimtang.

Sa mga taga Tabuelan pinangulohan nilang Mayor Raul ug Rex Gerona ug sa parokya ni San Juan Bautista salamat sa panaghigalaay nga inyong gihatag kanako, inyo akong gitudloan aron mamahimong mokalma panahon sa kalisud.

Salamat sa panahon ug sa inyong gipakita nga kalipay nga bisan pa man sa mga higayon sa kakulangan padayon gihapon kamong nihatag sa inyong kaugalingong gugma ngari kanako. Daghan pa unta akong angayang isulti o itagik apan basin maputos sa tubig ang bondpaper sa mga luhang moagas. Apan salamat.

Ang hustisya nagtudlo nga unta akong mahatag kun unsay alang sa simbahan ang iya sa simbahan ug mahatag nako ang alang sa akong kaugalingon usab. Kay mag-unsa man tuod ang tanan natong hinaguan kun mamahimo kitang pobre ug alaut atubangan sa Dios.

Mas maayo pa nga mamahimo kitang kabus atubangan sa kadaghanan basta mamahimo lang kitang adunahan sa mata sa kahitas-an. Salamat! ug daghan kaayong salamat! hangtud sa Sangi Alegria Pohon!