Balaud military sa N. O.
Kagahapong adlawa ang gisaad ni Philippine National Police Chief Oscar Albayalde sa pagpagawas sa resulta sa gihimong imbestigasyon nga iyang gimando tungod sa sunod-sunod nga patay sa Negros Oriental.
Sa miaging semana gipahibawo usab ni Presidente Rodrigo Roa Duterte ang iyang pagpasaka sa kantidad sa ganti nga madawat niadtong makahatag og kasayoran nga moresulta sa pagkasikop sa mga nagpatay sa upat ka mga polis sa Negros Oriental. Gikonsiderar usab sa Presidente ang pagpaubos sa maong probinsiya sa Balaud Militar apan magdepende kini rekomendasyon sa iyang mga magtatambag mahitungod sa seguridad.
Sigun sa 1987 Philippine Constitution, ang Presidente adunay gahum nga militar nga gibahin ngadto sa tulo ka klase sama sa una, gahum sa pagtawag sa militar aron puhagon ang kagoliyang ug mga kagubot sa usa ka dapit. Ikaduha, suspensohon ang pribilihiyo sa kamandoan sa habeas corpus ug ang ikatulo mao ang pagpaubos sa usa ka dapit ubos sa balaud militar kun gikinahanglan sa sitwasyon.
Apan kining maong gahum nga militar sa Presidente iya lamang magamit kun adunay invasion, rebellion ug kun gikinahanglan alang sa seguridad sa katawhan.
Giklaro sa Batakang Balaud nga dili basta-basta nga magamit sa Presidente ang iyang gahum nga militar tungod kay bisan pa man adunay invasion o rebellion apan kun wala kini kinahanglana alang sa seguridad sa katawhan dili kini magamit sa Presidente.
Sa Negros Oriental aduna bay invasion o rebellion? Ang tubag wala. Aduna bay presensiya sa lawless violence ang nahisgotang isla? Ang sunod-sunod nga patay sa Negros Oriental makonsiderar na ba nga lawless violence?
Kun lawless violence naman gani kini seguro matawag ni Duterte ang militar ug ang kapolisan aron mapuhag ang maong kaguliyang. Pero dili ang Presidente makapaubos sa isla sa Negros Oriental sa balaud militar.
- Latest