Serbisyo sa SEC

Atong namatikdan nga sukad ilusad ang kampanya batok sa kalangay sa serbisyo sa mga buhatan sa gobiyerno, kon kining gitawag nga kuskos balungos niining maong mga buhatan, medyo na-arang-arang ang mga serbisyo niini lakip na ang ‘No Noon Break’ policy.

Sa Report Card sa Civil Service Commission sa resulta sa 2013 Anti-Red tape Act kon ARTA, ilang gi-categorize ang findings into Failed, Acceptable, Good, Good, Excellent, ug Outstanding. Ang maong report giluwatan ug napatik sa mga mantalaan February 26, 2014.

Ang talaan naglakip sa mga buhatan sa national government, ang mga buhatang rehiyonal, mga sangang buhatan, ug mga extension offices., ug district offices. Pananglitan sa LTO, nga nabutang sa Failed category, naglakip sa mga buhatan sa Baliuag, San Jose,  Olongapo, Toledo, Jagna, Cagayan de Oro, Tawitawi, ug Mandaue City.

Sa 2014 report kini. Lagmit na-improved na ang ilang serbisyo karon. Na-excellent o na-outstanding na. Ang lungsod ray makahatag sa rating niini. Atong suwayan pagsulod ang ilang website, magpakisayud kita sa labing uwahi nilang report.

Hinuon, sa atong giingon sa unahan, generally, na-improved na ang ilang mga serbisyo karon. Karong bag-o miduaw ko sa regional office sa Securities  & Exchange Commission (SEC), kay dunay koy gipangayo nga information bahin sa dugay-dugay nang wala na mag-operate namong family corporation.

Sa mga gwardiya lang daan, matinagdanon na kaayo, dili istrikto, smiling pa. Sa ground floor mga batan-on ang nag-man sa nagkalainlaing section. Naabtan ko sa alas 3:00 sa hapon, ting-cut-off unta sa ilang pag-alagad, apan gihapon kong gitagad hangtud nahuman ang akong tuyo. Ingonman sa uban nga diha na sa sulod sa ilang buhatan.

Actually, alas 10:00 sa buntag ang akong appointment, alas 2:30 kong niabut, apan ila akong gikonsiderahan ug gialagaran. 

On the whole, mabutang sila sa category nga ‘excellent,’ di sad outstanding. Bag-o ang ilang Director, si Atty. Marylou Duka-Castillo.

Unta, ingon niini ang atmosphere sa tanang buhatan sa gobyerno, lakip ang mga buhatang local kon mga LGUs. Unta maoy ibutang sa hunahuna sa mga nag-alagad sa gobyerno, ma-director o ma-garbage collector man nga ang ‘public service is a public trust,’ sumala sa nabutang sa facade sa city hall.

Nga anaa sila sa ilang nahimutangan karon aron lamang  sa pag-alagad ug wa nay laing hinungdan, ug dili ang pagpadatu. 

By the way, sa “Failed” nga category, lima ka buhatan sa atong dapit ang nalakip; sa “Acceptable,” usa ra ang nalista, ang FDA Regional Office 7; sa  “Good,” sa kapin sa 1,000 nga mga buhatan sa nagkalainlaing dapit sa nasud, siyam (9) ra ang nakapasar dinhi sa ato:LBP Lapu-Lapu City, LBP, Cebu City, LRA Lapu-Lapu City, LTFRB Region 7 (morag sa panahon ni Ahmed Cuizon, LTO Lapu-Lapu City, NFA Cebu City, NSO Region 7, PAO Region 7, SEC Cebu City,

Unya sa “Excellent,” upat (4) ra: DTI Dumaguete  City, GSIS Tagbilaran City, LBP Siquijor, ug PAO Tagbilaran City. Wa may Cebu City, lupig lang ta sa Siquijor. Sa “Outstanding,” usa ra, ang CENRO Cebu City. Sa ako nang gipasabot dinhi, sa 2014 kini nga Report Card Survey Result sa CSC bahin sa pagpatuman sa ACTA kon Anti-Red Tape Act of 2013.