EDITORYAL - Balanse sa Endo

Daghan ang nadismaya ug nisaway ilabi na sa sector sa pamuo sa makalibog nga baruganan ni Pres. Duterte bahin sa Endo sa dihang iyang gi-veto ang balaudnon nga epektibong magputol sa maong sistema nga giingong hinungdan nga daghang mamumuo ang naabusaran sa mga kompanya.

Sa miaging buwan sa dili pa hingpit unta nga mahimong balaod ang Anti-Endo o Security of Tenure bill gi-veto niya kini.

Daghan ang nadismaya ug nakurat dili lang ang sektor sa pamuo kondili hasta sab iyang mga kaalyadong mga magbabalaod. Natural kadto nga reaksyon tungod kay si Duterte mismo maoy nisaad atol sa election campaign niadtong 2016 nga iyahang hunongon ang Endo. Usa kini sa mga nakapadaog kaniya ug gihimo pa niya kining priority bill aron nga daling mapasar diha sa Kongreso. Apan diay to, iyaha ra gihapong babagan.

Apan sa pagkatinuod, maayo kadto nga desisyon sa presidente. Ang tumong sa maong balaudnon nga maproteksyonan ang mga mamumuo gikan sa mga pagabuso sa mga kompanya aron magpadayon sila sa pagpanarbaho.

Apan ang gi-veto nga balaudnon giingong pro-labor ra gyud ug alkanse ang mga negosyante.

Dili unta kalimtan nga walay padulngan ang mga mamumuo kun tanang mga kompanya manirado o ba kaha dili na manawat pa og dugang mga trabahante kay dili nila mahatag ang tanang legal nga mga benepisyo sa mga kawani nga maoy buot sa maong balaudnon.

Pagkatinuod daghang mga kompanya karon sama sa mga job recruitment agencies o kontraktor nga nagsalig sa skills lamang sa mga trabahante sa partikular nga proyekto, trabaho o serbisyo apan dili maoy direktang produkto sa mga kompanya diin sila gipadala.

Mahimo sab nga gamiton sa mga tapulan ug abusadong mga empleyado ang maong balaod aron ipiton ang ilang mga kompanya.

Ang maayo niini, balansehon gyud ang mga kondisyon ug probisyon sa Endo bill nga dili makapatay sa mga kompanya ug mga negosyante sa samang higayon protektado ang mga empleyado ug dili maabusaran.