Fake news pag-sabotahe

Kapin na sa duha ka bulan gikan sa niaging eleksyon, apan daghan pa sa atong kaigsuonan ang wala pa kahuwasi sa kainit ug hilanat sa politika. Wala pa  sila makadawat sa resulta sa maong eleksyon, nga gumikan sa ilang pagka-diehard nga lumalaban sa ilang mga kandidato, mangimbento silag  mga kasayoran pagdaut sa nidaug nga mga kandidato.

Pananglitan, pipila ka presidente sa kahugpongan sa mga senior citizens ang nagpalakaw  sa sugilanon, nga gumikan sa pagkapilde sa ilang kandidato, wagtangon na ang financial assistance sa mga senior citizens sa dakbayan. Klaro kini nga fake news kansang katuyoan mao ang pagpanglanggaw ug paglibuglibog sa sitwasyon, o kaha pag-sabotahe gayud sa present administrasyon karon sa dakbayan sa Sugbo.

Sa ato nang gipatin-aw sa nangagi natong mga lindog, ang pagpanghatag sa cash assistance usa na ka ordinansa, busa dili na kini mapahunong, gawas kon magpasar ang atong Konseho og laing ordinansa nga pag-rebokar o pag-repeal o pag-rescind niining maong ordinansa. Apan kinsa man sa atong mga konsehal karon, ma-administrasyon o ma-oposisyon ang mangahas ang mangamahan pag-kanselar o pag-abrogate niini?

So, imposible kaayo nga ma-abolish ang atong cash assistance. Kon di mo motuo nako, na, kamo lang. Ug kinsa man sad ang inyong tuohan?

* * *

Niay nindot kaayong balita ....  nahibawo na man tingali mo niini, kining pagpirma ni Presidente Digong Duterte sa Commission of Senior Citizens Act nga maoy mag-umol sa mga polisiya ug mapatuman sa tinguha sa kagamhanan pag-asistir sa elderly population sa atong nasud ug paghatag ngadto kanila sa tukmang recognition ug appreciation.

Kining maong commission  nag-abolish sa National Coordinating Council and Monitoring Board (ug lagmit lakip ang mga regional counterparts niini), nga sa akong tan-aw wala maglihok busa walay kapuslanan.

Lapad ang kaakohan niini, among others of which mao ang pag-establish og mga community-based health and rehabilitation, educational and socio-economic programs alang sa mga senior citizens.   

Nagkanayon ang Balaud: “Consistent with this policy, the State shall promote the advocacy of and collaboration between different stakeholders and senior citizens to ensure the effective implementation of various programs and services, particularly on the development of senior citizens and advancing their health and well-being, and ensuring a supportive and enabling environment for the elderly.”

Ang Commission ibutang ubos sa Office of the President, uban sa usa ka Chairperson ug unom ka Commissioner, ug mo-function isip usa ka collegial body. Ang unom ka commissioner mag-represent sa nagkalainlaing geographical regions  sa nasud. Ang nakanindot kay ang anha ra sila mag-opisina sa ilang mga respective regions.

Sa ato pa, ang atong commissioner sa region 7 anhi ra sa atong region, most probably anhi sa Sugbo mag-opisina. Unom ka tuig ang ilang term; ug gisitar sa balaud nga ang mga appointees kinahanglan i-rekomendar sa general assembly sa mga kahugpongan sa senior citizens, adunay igong kasinatian ug actual nga involvement sa kalihokan sa mga senior citizen; ug at least adunay duha ka  babaye nga commissioner.  Kun ikaw dili sakop sa kapunongan, kun member man apan walay tambong-tambong sa tigum ug sa mga kalihokan, ug maghuwat lang kanus-a manghatag sa cash assistance, dili ka mahimong Senior Citizen Commissioner.