Bag-ong car plates nangabot

Kadtong mga tag-iya og sakyanan nga nagparehistro sa LTO district office sa Mandaue City ug nagpabag-o sa ilang mga karaang plaka kaniadtong Enero hangtud sa Mayo 2015, nangabot na ang bag-o ninyo mga plaka.

Nagparehistro ko kagahapon sa akong sakyanan ug gitug-anan ko ni Ma’am Melva Vasquez, ang registration division chief sa LTO-Mandaue City, nga kapin sa 3,000 ka bag-ong mga plaka sa sakyanan ang nangabot gikan sa ilang central office sa Manila.

Hala, kadtong mga nagpabag-o sa ilang mga plaka ug nakabayad og P450 kaniadtong Enero hangtud sa Mayo 2015, adto dayon mo sa LTO Mandaue City.

 Wala ko makasusi sa ubang mga LTO district offices, pero nagtuo ko nga duna sab tingali nangabot nga mga plaka didto.  Angay ninyo nga kuhaon ang bag-ong plaka sa inyong mga sakyanan, kanang itom na ang marka.

Kon ang sakyanan nabaligya na gani, ug kamo ang nakapalit, dad-a ang papeles sa pagbaligya sa sakyanan, aron ihatag kaninyo ang plaka.

* * *

Nindot na unta kaayo ang aseras sa Osmeña Boulevard gikan sa eskina Sanciangko paingon sa Colon nga gihawanan sa mga sakop sa Probe Team nga gipangulohan ni Raquel Arce.

Apan temporaryo ra diay ang atong pagmata kay gitug-anan ko ni Arce nga ibalik diay gihapon sa administrasyon ni Mayor Edgardo Labella ang mga tindera nga naninda sa aseras.

Ang tinuod, abuso na man gud kaayo ang gihimo sa nga naninda sa aseras, ilabi na og dili sila badlongon sa Probe kay ang ilang mga baligya naa nangyud nila gilapag sa agianan sa mga tawo.

Pastilan, kita na hinoon nga mga maglakaw sa aseras ang magkinto kay kon mayatakan nimo ang ilang baligya, labi na og mga Muslim, aw sigurado ka gyud nga makakita og away.

Mao nga kon ako’y pangutan-on, mahimong tugotan nga may sidewalk vendors, apan ang agianan sa mga tawo dili gayud isakripisyo.

* * *

Kon gusto man gyud si Mayor Edgardo Labella nga limpyo ug hapsay ang dakbayan sa Sugbo atol sa iyang administrasyon, kinahanglang dugangan niya ang nga sakop sa Probe.

Kini aron natagad gyud nila ang mga nangabuso ug niukopar na sa aseras. Angay usab nga destinohan gayud sa mayor og abogado nga kanunay’ng kontak sa Probe kay ang ubang gub-onon nagkinahanglan og mga legal documents ang pagpaguba.

Dakong hagit kang Mayor Labella nga dinhi sa Sugbo iyang parehasan ang gihimo ni Mayor Isko Moreno sa kaulohan nga walay kukahadlok nga miguba sa mga estraktura nga anaa gitukod sa public place.

Daghan kaayo kini dinhi sa dakbayan ug gilingiwlingiwan ra sa mga opisyal.

Aw bisan si Mayor Labella nakakita kon unsay angay’ng papahawaon diha sa daplin sa mga karsada.

Hagit kang Labella nga ibalik niya ang karsada diha sa Barangay Suba nga wala na karon igkita kay gitukoran na og kabalayan sa mga abusado.