Kun gugma na gani ang mosugo

Mahimong bugo ang imong kaugalingong hunahuna kay dunay kaugalingong hunahuna ang imong kasingkasing. Mahimong gubton ang tanan ug talikdan ang imong kaugalingong seguridad. Kini ang hinungdan kun nganong sa makadaghan kita mohunahuna sa atong padulngan. Apan kun buot hunahunaon, nindot ang mamahimong matinud-anon sa kaugalingong gibati. Kining maong paagi makapahimo sa tawo nga gawasnon.

Ang tinuod nga gawasnon mao man ang tawo nga makapadayag sa iyang kaugalingon.  Sama sa gugma nga mahimo nimong ipadayag sa tukmang panahon ug sa tawo nga imong gitagan-an niini.

Apan dunay mga higayon nga nahimong komplikado ang gugma. Komplikado tungod kay dili tanan makasabot ug kun nganong dili tanan makasabot tungod kay daghang mga tawo ang dili buot mosabot sa imong kahimtang. Tingali kay sila mismo ang na trauma ning maong kasinatian. Dunay degree of truth ang giingon nilang gugma.

Ang uban bation man gani og tumang kasakit. Kay human ihatag nila ang tanan ila man nuong nasinati ang tumang kapakyasan.  Apan ingon ana gyud tingali ang kinabuhi. Mahimong biyaan ka sa imong gisaligan apan wala kini magpasabot og kadautan. Hugno man tuod ka apan ang maong kahugnoan maoy sinugdanan sa laing pagbangon.  Kay diha sa pagkahugno nahimong masabtan mo ang kahulogan kun nganong kinahanglang motamak ka sa lapok.

Ingon ini ang kasinatian kun maghisgot kita og gugma sa usa’g usa. Mahimong biyaan nimo ang imong nahimutangan malipay lang ang tawo nga giisip mong importante kaayo alang nimo. Kay dili mahimong bilanggoon ang tawo nga buot mamahimong gawasnon. Sakit man tuod apan kinahanglanon.

Daghan na karon ang gidili. Mao nga nahimong magkinto na gyud ang daghang tawo labina kun apilon pagdili ang paghigugma kay lagi gihimo niining biktima ang daghang mga kasingkasing. Apan bisan pa man kun kini idili nan, mamahimong mangita kini sa iyang agianan kay matag gugma dunay agianan…kun wala nimo ni masabti kana tungod kay wala nimo tugoti nga mosubay ang pinitik sa imong kasingkasing sa buot nimong adtoan.