Goodbye, I’m coming

Labing siguro usbon sa editor ang ulohan ning maong lindog kay nganong Eninglis nga unta bisaya mang dako kining maong pamantalaan ug ang unod niini. Kun usbon man wala koy mahimo pero kun dili salamat kaayo.

Ang lindog nga imong gibasa naghisgot sa pagpasirado ni Presidente Rodrigo Roa Duterte sa numbers game nga gipadagan sa Philippine Charity Sweepstakes Office (PCSO) lukop nasud tungod sa giingong panagkUnsabo sa mga opisyal sa PCSO ug mga Franchisee niini nga miresulta sa pagka-alkanse sa gobIyerno og 60 - 70 porsiyento sa kita niini. Buot ipasabot kurapsyon ang hinungdan sa pagpasirado sa operasyon.

Si Atty. Salvador Panelo, tigpamaba sa Malakanyang miingon nga nagsalig na lamang pod sa sugal ang katawhan maong gipahunong sa Presidente ang numbers game sa PCSO.

Goodbye na ba ang numbers game sa PCSO? Kun tinud-on sa Presidente ang pagwagtang sa sugal ato siyang abibahan sa kondisyon nga iya usab nga wagtangon ang mga sugal nga gipadagan sa Philippine Amusement Gaming Corporation o PAGCOR.

Kun dili mapahunong sa Presidente ang sugal nga gipadagan sa PAGCOR, coming ang numbers game sa PCSO. Sigurado ko nga mabalik kini inig ka human sa gihimong imbestigasyon sa giingong korapsyon nga nahitabo sa PCSO?

Kinsa ang nagbulgar sa kurapsyon ug unsa siya ka impluwensiyado sa Presidente nga miresulta sa pagpasira sa operasyon sa PCSO? Si Senador Ping Lacson, Sandra Cam ug uban pa mibulgar na sa kurapsyon sa PCSO pero wala kini makapaaghat sa Presidente sa pagpasira sa operasyon niini.

Sa wala pa nagsugod ang turn-over ceremony sa bagong hepe sa Cebu City Police Office nga akong gitambongan gibulgar sa bag-ong General Manager sa PCSO nga si Col. Royina Marzan Garma nga nagsakit ang iyang ulo human niya nadiskobrihan nga walay kuwarta ang PCSO ug duna pa kini daghan nga bayranan.