Pagbalik sa death penalty

Morag mobalik na sa dili madugay ang death penalty sa Pilipinas human nga mipadayag si Presidente Rodrigo Duterte nga gusto niya kining mapatuman pag-usab niining nahabiling pipila ka tuig sa iya nga administrasyon.

Sa iyang State of the Nation Address sa niaging semana, gihangyo ni Duterte ang mga magbabalaod sa duha ka sanga sa Kongreso sa pagbuhat og balaudnon nga nagbalik sa capital punishment dinhi sa nasud.

Hinuon, gusto sa presidente nga ang maong death penalty naglutos lamang niadtong mga nalambigit sa negosyo sa ilegal nga druga ug sa naghitak nga corruption sa nagkalainglain nga mga pangpubliko nga opisina sa nasud. Hagbay ra kining maong mga problema sa druga ug corruption nga naglikos dinhi sa Pilipinas.

Apan hangtud karon padayon kining mihasi nga morag wala na siguroy kasulbaran pa. Mao nang gipangusgan karon nga mahibalik ang death penalty.

Kabahin sa Kongreso, gipaabot nga dali ra nga maumol ug mapasar ang balaudnon nga nagbanhaw sa death penalty. Kini tungod lagi kay mayoridad sa mga magbabalaud mga kaalyado man sa administrasyon.

Ambot kun makapakgang ba sa katapusan ang death penalty sa negosyo sa ilegal nga druga ug corruption sa kagamhanan. Gani, sa buhi pa ang death penalty kaniadto, padayon gihapon ang pagtumaw sa mga linuog nga krimen.

Hinuon, usa sa hinungdan niini mao ang kakulang sa paningkamot sa kagamhanan nga mataral kadtong mga konbiktado ngadto sa silot kamatayon. Kay kun adunay na gani naka-schedule ngadto sa lethal injection chamber kaniadto, mapakgang dayon kini tungod sa mga pagbabag sa mga sektor, ilabina sa simbahan.

Atong atangan kun moepekto ba ang pagbalik death penalty sa nasud, ilabina niining panahon sa administrasyon ni Duterte. Kun makapakgang ba kini sa paghitak sa druga ug corruption, siguro agta ray nasayod.