Saludo ko ni Labella

Akong daygon si Mayor Edgardo Labella kay balikon niya ang pagmugna og mga komitiba ug mga Boards aron maoy tahasan sa pag-atiman sa lainlaing mga isyu alang sa epektibo nga pagdumala sa siyudad.

Sa administrasyon ni kanhi Mayor Tomas Osmeña, wala gani gimugna sa mayor ang Police Coordinating and Advisory Council (PCAC) nga magsilbe unta nga Peace and Order Council nga gilatid gyud sa balaod.

Sa traffic, wala sab gimugna ni Osmeña  ang CITOM Board kay aron ang tanang mga pamaagi pagdumala sa trapiko, gikan ra gyud kaniya. Resulta, ang siyudad nakasinati og grabeng problema sa trapiko.

Dili sab ko mopabor nga ang kapin sa 50 ka commissions ug mga Boards atol sa administrasyon ni kanhi mayor Michael Rama, nga hutdon gyud sa pag-revive kay ang uban niadto mora’g nag-duplicate na ang ilang mga trabaho.

Apan ang PCAC kinahanglan gyud kaayo kay mao kini ang mo-ccordinate sa lainlaing mga ahensya sa kagamhanan, sama sa Napolcom, Prosecutors Office, BJMP, PNP, NBI, PDEA, ug daghan pa.

Ubos sa balaod (Republic Act 8551) ang mayor maoy gitahasan sa pagsuperbisar sa kampanya batok sa ilegal nga sugal, apan makita nimo nga mikatap pag-ayo ang mga illegal gambling dinhi sa siyudad bisan atol sa termino ni Osmeña, kay wala man mahatagi og pagtagad.

Sa traffic sab, daghang mga angayang himoon aron makatabang nga dili kaayo mograbe ang traffic, apan unsaon nga ang mayor ra man maoy maghunahuna og paagi kay wala man niya gimugna ang CITOM Board.

Dili ikalimod nga sa kadaghang giatiman sa mayor, dili na niya maatiman ang tanang gimbuhaton, ilabi na kon ang iyang mga sinaligan utro sab nga walay tinguha nga sulbaron ang problema.

Karon ubos sa administrasyon ni Mayor Labella, naglaum ko nga kay ipatuman man niya ang “Rule of Law”, basin og anam-anam na nga masulbad ang mga problema sa siyudad, sama sa traffic, lunop-baha ug basura.

* * *

Nakabalik na sa ilang serbisyo kagahapon ang kapitan ug mga konsehal sa Barangay Ermita nga gisuspenso sa ilang mga katungdanan sa Ombudsman tungod kay napamatud-an nga sila sad-an tungod sa wala pagtabang sa mga sakop sa PDEA nga mipahigayon og anti-drugs operations sa ilang dapit.

Unta, ang nahitabo nila ni Kapitan Mark Miral ug mga kaubang konsehal kapanaminan sa ubang mga opisyal sa dakbayan nga magpadikidiki pag-abag sa mga polis kon may raid, ilabi na kon ang subject sa raid, ilang mga suod.

Daghan kaayo ang mga opisyal sa barangay nga ingon niini og batasan ug gidayeg sab nako ang hepe sa PDEA kaniadto nga wala mahadlok nga mipasaka og kaso batok sa mga opisyal sa Ermita.