SONA

Kagahapon sa hapon gihimo ni Presidente Rodrigo Roa Duterte ang iyang ika upat nga SONA o State of the Nation Address atubangan sa mga sakop sa kongreso ug dinapit nga mga halangdong tawo.

Ang SONA usa sa mga gahom sa Presidente diin iyang itaho ngadto sa kongreso ang iyang mga nahimo sa iyang pagdumala sa nasud matag tuig ug ang iya pang himuon sa umaabot pang tuig sa iyang termino isip Presidente.

Sigun sa atong Batakang Balaud o Constitution ang SONA himuon matag ika upat nga Lunes sa buwan sa Hulyo matag tuig.

Ang Presidente mohimo sa iyang taho ngadto sa kongreso tungod kay mao man kini ang representante sa katawhan. Isip representante sila na ang mopaabot sa taho sa Presidente ngadto sa katawhan mahitungod sa mga nahimo ug himuonon pa niini.

Sa ka dako sa populasyon sa nasud dili maato sa Presidente ang pagpakigkita sa katawhan aron mapahibawo ang iyang mga nahimo ug mga himuonon maong ipaagi na lamang kini sa ilang mga representante. Mao ni ang SONA.

Sa wala pa ang SONA gibahin sa tulo ka cluster ang mga sakop sa gabinete sa Presidente aron tadlason ang nasud sa pagpahigayon og sunod-sunod nga mga Forum aron ibida ang mga nahimong proyekto ug mga programa ni Presidente Duterte.

Ang unang Forum giulohan og “Patuloy ang Pag-unlad” gihimo niadtong Hulyo 1 sa Manila gipangunahan sa Economic Development and Infrastructure Cluster, gisundan kini sa “Patuloy na Malasakit at Pagkakaisa Forum niadtong Hulyo 10 nga gihimo dinhi sa Sugbo nga gipangulohan sa Human Development and Poverty Reduction Cluster ug Participatory Governance Cluster dayon sa “Patuloy na Katatagan” Forum didto sa Davao City niadtong Hulyo 17 nga gipangonahan sa Climate Change Adaptation, Mitigation and Disaster Risk Reduction Cluster ug Security, Justice and Peace Cluster