Giandam nga paraiso

Niadtong Hulyo 20 ang kasumaran sa akong adlawng natawhan apan dili happy kon dili sad birthday, ang labing subo nga birthday nako tungod kay sa punerarya man nagkatapok kaming tanan nga mga miembro sa pamilya kauban ang among inanan nga anaa na sa iyang lungon.

Dili gani unta ko mosumiter sa akong lindog karong adlawa tungod kay daw walay mahunahunaan nga tukion tungod kay katong adlawa pud itunod siya sa iyang kataposang pahuwayan.

Ipaambit lang nako ang kamatuoran nga kinahanglang dawaton, bitaw naanad lang ko nga kada birthday ang akong inahan ang motawag og una kanako dayon motimbaya, walay paltos sukad sa akong pagka bata tungod seguro kay ako ang kinamanghoran ug pinaka pinangga.

Sa iyang pangidaron nga 82 anyos mitaliwan sa kalibutan maingon na nato nga bonus nga kinahuhi.

Apan sa wala pa mamatay akong mama naningkamot kini nga makasabay sa kabag-ohan aron maka kontak siya sa iyang mga anak ug apo.

Makahibalo siya mo-text ug motawag sa cellphone, dili gyud niya ibuwag ang iyang cellphone kay magsige ug text kanamo nga iyang mga anak.

Tungod sa iyang kamingaw maningkamot nga maka kontak, apan tungod sa ka busy sa mga anak seguro usa na ko ani, dili maatiman sa pag reply ang iyang mga text.

Usahay dili matubag ang mga tawag ug dili usab siya matawagan.

Usa ka higayon niana tungod sa iyang katiguwangon ug kaluya na usab dihang na admit siya sa hospital kaniadto nahingangha ang nurse kay nagsige pa man og pindot sa iyang cellphone.

Dihang nauso ang touchscreen naglisod man siya apan nakamao na sa kadugayan pero ang iyang gi master ang messenger call.

Walay palta sa pagtawag pinaagi sa messenger matambalan lang ang kahaw-ang sa iyang gibating kamingaw sa mga anak nga nagkatibulaag na human nangaminyo.

Ingon niini ang gugma sa akong inahan ngadto kanamo nga iyang mga anak.

Karon wala na siya, gibati na nako ang tumang kahaw-ang tungod seguro kay guilty ko sa mga pagkuwang dihang buhi sa pa siya.

Wala nay manawag sa messenger bisan sayo sa buntag, walay nay manawag bisan unsang orasa taliwala sa akong duty nga dili nako matubag kay nag interview pa ko sa mga news source.

Ang unang greeter sa birthday wala na mo greet nako, apan nawala man siya physically apan nasayod ako nga nag level up na siya didto sa langit nga maoy among magbalantay. Kon nahimo niyang makasabay sa teknolohiya dinhi sa yuta. nahimo na usab siyang anghel nga maoy among kasumbongan ug siya ang mohonghong ngadto sa Labawng Makagagahum.

Niuna siya tungod kay giandam niya ang paraiso alang sa iyang mga anak inig abot sa panahon sa gikatakdang sunod nga panagkita.