Magsakripisyo ang mga pasahero

Nindot unta nga dalion sa atong kagamhanan ang paghulip na niining mga kagangkagang ug mga gagmitoy kaayong sakyanan nga gigamit isip pasaheroan.

Matud pa nga kapin sa 200 ka modernized PUJ ang mangabot dinhi sa siyudad sa dili madugay.

Malooy ko nga magtan-aw sa mga pasahero nga mapugos ra gyud tawon sa pagsakay niining mga multicab nga giputol unya gisumpayan aron motaas, dayon gihimoan og kaha aron gamiton sa pagpamasahero. Gawas nga mubo ang iyang atop ug hayan mapakong ka kon dili magmatngon, maglisud ka pa gyud pagsulod kay nag-abot ang masig ka tuhod sa mga pasahero nga nag-atbang sa paglingkod.

Unta, dunay mga konsehal nga makakita sa kakuwangan sa mga tag-iya og mga PUJ nga nagkangkang lang ang kamot nga modawat sa abang gikan sa ilang mga driver, apan wala magtagad pag-atiman sa ilang mga sakyanan aron dili mahasol ang mga pasahero. Daghan sa ilang mga sakyanan ang guba, ug ang uban wala gyuy foam nga sandiganan. Dapit sa ulo sa pasahero nga maglingkod, angay sab unta kini nga butangan og foam nga magsilbeng protektor aron kon ang sakyanan makagi og libaong, dili mabunal sa puthaw ang ulo sa mga mosakay.

Bisan gani ang gunitanan sa mga pasahero nga anaa sa ibabaw sa ilang atubangan, kinahanglang puston og foam aron nga kon aksidente nga mapakong ang mga pasahero, dili sila makabatyag og sakit.

Unsay gihimo sa ubang operators? Gipasagdan ra nila ang ilang mga driver nga ang reserba nga ligid anaa gibutang sa luwang sa sakyanan nga mapugos tawon ang pasahero sa pagtungtong niini kon maglingkod ug nakapalisud sanilang kahimtang.

Siyaro, daghang mga bag-o nga konsehal sa lainlaing siyudad ug mga lungsod, himoi ninyo kini og ordinansa. Kon inyo kining mahimo, sigurado ko malipay kaninyo ang publiko nga mga sumasakay og PUJ.

* * *

Nakigtigom si Mayor Edgardo Labella sa bag-ong director sa kapolisan sa dakbayan sa Sugbo nga si Koronel Gemma Vinluan uban sa iyang mga opisyal.

Panahon ni Koronel Royina Garma, saludo ko sa kampanya nila batok sa ilegal nga drugas, apan nakapangyam-id ko kay molingiw sila paghimo’g kampanya batok sa ilegal nga mga sugal nga mikatap dinhi. Aw, sumala gud, nakadungog ba kamo nga ang kapolisan nangronda sa mga ilegal nga outlets sa lotto? Nakadungog ba kamo nga gihimoan og operation sa kapolisan ang midagsang pag-ayo nga mga video karera ug molimoli sa lainlaing dapit sa dakbayan?

Atong panid-an ang bag-ong direktor sa Cebu City Police Office kay dili man usab makiangayon kon sawayon nato nga wala pa gani siya makprobar nga takus siya nga modumala sa katungdanan.

Basta kay ang kampanya sa ilegal nga drugas dili kay mao ra ang trabaho sa polis, apilon nila ang paghimo’g kampanya sa mga ilegal nga sugal aron walay magduda nga kini ilang giproteksyonan.